രാജമൗലിയുടെ ബ്രഹ്മാണ്ഡ ചിത്രം ആർആർആറിലെ ‘നാട്ടു നാട്ടു’ എന്ന ഗാനം കൊണ്ട് ലോക പ്രശസ്തി നേടിയിരിക്കുകയാണ് കൊഡൂരി മരകതമണി കീരവാണിയെന്ന എം.എം.കീരവാണി. ആർആർആറിലെ പാട്ട് ഗോൾഡൻ ഗ്ലോബ് പുരസ്കാര നേട്ടം കൈവരിച്ചപ്പോൾ ഇന്ത്യയൊട്ടാകെ അഭിമാനം കൊണ്ടു. നിരവധി പേരാണ് കീരവാണിയെ പുകഴ്ത്തി രംഗത്തു വന്നത്. നമ്മുടെ നാവിൻ തുമ്പിലുള്ള പല മലയാളം ഗാനങ്ങളും ഒരുക്കിയത് കീരവാണി ആയിരുന്നു എന്നുള്ള സത്യം ഇന്നാണ് പല മലയാളികളും തിരിച്ചറിയുന്നത്. ഇപ്പോഴിതാ, കീരവാണിയുടെ ഒരു അപൂർവ്വ ചിത്രം പങ്കുവെച്ചിരിക്കുകയാണ് ഗായകൻ എം.ജി ശ്രീകുമാർ.
‘ഞാൻ എടുത്ത ഒരു ഫോട്ടോ. താളവട്ടം സിനിമയുടെ റീ റെക്കോർഡിംഗ് വേളയിൽ. എംവിഎം ആർആർ സ്റ്റുഡിയോയിൽ. ഇടത് എ.ആർ റഹ്മാൻ, നടുക്ക് രാജാമണി( മ്യൂസിക് ഡയറക്ടർ), കാവി മുണ്ട് ഉടുത്ത് മണിച്ചേട്ടന്റെ അസിസ്റ്റന്റ് ആയി നിൽക്കുന്നത്, ഇന്ന് ഗോൾഡൻ ഗ്ലോബ് പുരസ്കാരം നേടിയ കീരവാണി. അദ്ദേഹത്തിന്റെ അന്നത്തെ പേര് “മരഗതമണി”. ഹിന്ദിയിൽ “എംഎം ക്രീം”. നമുക്ക് അഭിമാനിക്കാം’ എന്ന് കുറിച്ചു കൊണ്ടാണ് എം.ജി.ശ്രീകുമാർ ചിത്രം പങ്കുവെച്ചിരിക്കുന്നത്.
1991ൽ ഇറങ്ങിയ മമ്മൂട്ടി ചിത്രം നീലഗിരി മുതൽ ധീരയും ഈച്ചയും ബാഹുബലിയും ആർആർആറും എന്നിങ്ങനെ മൊഴി മാറ്റി മലയാള പ്രേക്ഷകരുടെ ഹൃദയം കവർന്ന ചിത്രങ്ങളിലൂടെയെല്ലാം കീരവാണി മലയാളികൾക്കിടയിൽ തന്റെ സ്ഥിരസാന്നിധ്യം അറിയിച്ചുകൊണ്ടേയിരുന്നിരുന്നു. നീലഗിരിയിലെ ‘കറുകനാമ്പും കവിത മൂളും’ എന്ന ഗാനവും ‘ദേവരാഗം’, ‘സൂര്യമാനസം’ എന്നീ ചിത്രങ്ങളിലെ പാട്ടുകളും കീരവാണിയുടേത് ആയിരുന്നു. കൂടാതെ ‘ശിശിരകാല മേഘ മിഥുന രതിപരാഗമോ’, ‘യയ്യയാ യാ യാദവാ എനിക്കറിയാം’ ഈ വരികളൊക്കെ ജീവസ്സുറ്റ പാട്ടുകളായി പിറവികൊണ്ടത് കീരവാണിയിലൂടെയാണ്.
Comments