മലയാളികൾ ഹൃദയത്തിലേറ്റിയ യുവതാരമാണ് ഉണ്ണി മുകുന്ദൻ. ഗുജറാത്തിൽ പഠിച്ചു വളർന്ന താരം, സിനിമാ മോഹവുമായാണ് കേരളത്തിലേയ്ക്ക് ട്രെയിൻ കയറിയത്. മല്ലുസിംഗിലൂടെ മലയാളി പ്രേക്ഷകരുടെ മസിലളിയനായി തുടങ്ങി, മാളികപ്പുറത്തിലൂടെ സാക്ഷാൽ അയ്യപ്പനായി ലക്ഷകണക്കിന് സിനിമാ പ്രേമികളുടെ ഹൃദയത്തിൽ നടൻ കുടിയേറി. കേരളത്തിലും പുറത്തും മാളികപ്പുറം എന്ന സിനിമയ്ക്ക് വലിയ ജനപ്രീതിയാണ് ലഭിക്കുന്നത്. ഉണ്ണിയുടെ കരിയറിലെ തന്നെ ഏറ്റവും വലിയ വിജയമായി മാറി ചിത്രം. ഇപ്പോഴിതാ, തന്റെ പഴയകാല ചിത്രങ്ങൾ പങ്കുവെച്ചു കൊണ്ട് സ്വപ്ന തുല്യമായ യാത്ര ഓർത്തെടുക്കുകയാണ് താരം. തന്റെ സ്വപ്നങ്ങൾക്കൊപ്പം നിന്നവർക്കും ജനങ്ങൾക്കും അദ്ദേഹം നന്ദിയും പറഞ്ഞു.
‘എന്റെ ജീവിതത്തിലെ ഏറ്റവും വിലപിടിപ്പുള്ള രണ്ട് ചിത്രങ്ങൾ പങ്കിടുന്നു. അഹമ്മദാബാദിൽ നിന്ന് തൃശ്ശൂരിലേക്ക് ട്രെയിനിൽ കയറുന്ന ദിവസങ്ങൾ. ഒരു ദിവസം ഞാൻ ചെയ്യുന്നതെല്ലാം എല്ലാവർക്കും മനസ്സിലാകുമെന്ന് വിശ്വസിച്ചു. എനിക്കറിയാം, ഞാൻ വളരെ സന്തോഷവാനായിരുന്നു, ഓരോ തവണയും ഈ ചിത്രങ്ങൾ കാണുമ്പോൾ, ഒരു പുഞ്ചിരിയോടെ ഞാൻ എന്നെത്തന്നെ കണ്ടു. എന്റെ ലക്ഷ്യത്തിലേക്കുള്ള യാത്രയുടെ ചെറിയ ഒരു വശം മാത്രം കാണിക്കുന്ന ചിത്രങ്ങൾ. എന്റെ അഭ്യുദയകാംക്ഷികളോടും എന്റെ ഈ ജീവിതം രൂപപ്പെടുത്താൻ കൂടെ നിന്നവരോടും എനിക്ക് പറയാനുള്ളത് ഒരു വലിയ നന്ദിയാണ്’.
‘ഈ യാത്രയിൽ ഞാൻ കണ്ട വലിയ സ്വപ്നത്തിലേയ്ക്ക് എന്നെ അടുപ്പിച്ചതിന് നന്ദി. സ്വപ്നങ്ങൾ കാണണം, വിശ്വസിക്കണം, ഓടി അതിനെ കീഴടക്കണം. മാളികപ്പുറം എന്റെ കരിയറിലെ ഏറ്റവും വലിയ ബ്ലോക്ക്ബസ്റ്റർ ആക്കിയതിന് നന്ദി. നിങ്ങളുടെ ഹൃദയത്തിൽ സ്പർശിക്കാനും നിങ്ങളുടെ കണ്ണുകൾ നനയ്ക്കാനും നിങ്ങളുടെ ജീവിതത്തിൽ സന്തോഷത്തിന്റെ ചെറിയ നിമിഷം കൊണ്ടുവരാനും കഴിഞ്ഞതിൽ എനിക്ക് സന്തോഷമുണ്ട്. അതാണ് സിനിമ. അടുത്തുള്ള തിയറ്ററിൽ പോയി സിനിമ ആസ്വദിക്കൂ. തോൽക്കാൻ മനസ്സില്ലാത്തവനോട് പ്രപഞ്ചം എപ്പോഴും ഭ്രാന്തമായി പ്രണയത്തിലായിരുന്നു. സ്വപ്നം കാണൂ..ലക്ഷ്യം വെയ്ക്കൂ..സ്വന്തമാക്കൂ..’ എന്നാണ് ഉണ്ണി മുകുന്ദൻ ഇൻസ്റ്റാഗ്രാമിൽ കുറിച്ചത്.
