ശബരിമലയ്ക്കുള്ള യാത്രയിൽ അപ്രതീക്ഷിതമായി കണ്ട ഒരു കൂടിക്കാഴ്ചയെക്കുറിച്ച് പങ്കുവച്ചിരിക്കുകയാണ് ഉണ്ണി മുകുന്ദൻ. മഹാപ്രതിഭയായ ശ്രീകുമാരൻ തമ്പിയെ കാണാൻ സാധിച്ച അനുഭവമാണ് നടൻ ആരാധകർക്കായി പങ്കുവച്ചത്. അദ്ദേഹത്തിന്റെ ജീവിതത്തോടുള്ള കാഴ്ചപ്പാട് തന്നെ വളരെയധികം വിസ്മയിപ്പിച്ചുവെന്ന് ഉണ്ണി മുകുന്ദൻ പറയുന്നു.
ശ്രീകുമാരൻ തമ്പിയോടൊപ്പം മല കയറുന്ന വീഡിയോയും ഉണ്ണി ഫേസ്ബുക്കിൽ പോസ്റ്റ് ചെയ്തിട്ടുണ്ട്. ഇത്തവണത്തെ ശബരിമല യാത്രയിലെ അപ്രതീക്ഷിതമായ ഒരു കൂടിക്കാഴ്ചയെന്ന തലക്കെട്ടോടെയാണ് അദ്ദേഹം കുറിപ്പ് തുടങ്ങുന്നത്. ”നാലരപ്പതിറ്റാണ്ടിനിപ്പുറം, 1975ലെ സ്വാമി അയ്യപ്പന്റെ രചയിതാവും, ഗാന രചയിതാവും, ഈ വർഷത്തെ ഹരിവരാസനം പുരസ്കാര ജേതാവുമായ മഹാപ്രതിഭ ശ്രീകുമാരൻ തമ്പി സാറിനെ കാണാനും ഒരുമിച്ച് മലയിറങ്ങാനും സാധിച്ചു. എന്നെ വിസ്മയിപ്പിച്ചത് സാറിന്റെ ജീവിതത്തിനോടുള്ള കാഴ്ചപാടുകളും ആറ്റിറ്റിയൂടും ആണ്.” ഉണ്ണി ഫേസ്ബുക്കിൽ കുറിച്ചു.
മാളികപ്പുറം എന്ന സിനിമയിൽ അയ്യപ്പനായി അഭിനയിക്കാൻ സാധിച്ച തനിക്കും തന്റെ സിനിമയ്ക്കും ഒരുപാട് നല്ല അഭിപ്രായവും ആശംസകളും അറിയിക്കുന്നതിനൊപ്പം കരിയറിനെ കുറിച്ച് വിലയേറിയ നിർദേശങ്ങൾ തരികയും ചെയ്തു. ഒരുപാട് സ്നേഹത്തോടെ നന്ദി അറിയിക്കുന്നുവെന്നും ഉണ്ണി പറഞ്ഞു.
Comments