ന്യൂഡൽഹി: ബിജെപി ദേശീയ നിർവാഹക സമിതി യോഗത്തിന് തിങ്കളാഴ്ച തുടക്കമാകും. പ്രധാനമന്ത്രി നരേന്ദ്ര മോദിയുടെ അദ്ധ്യക്ഷതയിലാണ് ഡൽഹിയിലാണ് യോഗം നടക്കുക. ദ്വിദിന യോഗത്തിൽ കേന്ദ്രമന്ത്രിമാർ, കേന്ദ്ര-സംസ്ഥാന ഭാരവാഹികൾ, ബിജെപി ഭരിക്കുന്ന സംസ്ഥാനങ്ങളിലെ മുഖ്യമന്ത്രിമാർ എന്നിവരും പങ്കെടുക്കും.
തിങ്കളാഴ്ച രാവിലെ 10 മുതൽ ഉച്ചയ്ക്ക് 2 വരെ പാർട്ടി ആസ്ഥാനത്ത് നടക്കുന്ന ദേശീയ ഭാരവാഹി യോഗത്തോടെ ആരംഭിക്കുന്ന യോഗത്തിൽ 350-ഓളം ഭാരവാഹികൾ പങ്കെടുക്കുമെന്ന് ദേശീയ ജനറൽ സെക്രട്ടറി വിനോദ് തവാഡെ പറഞ്ഞു. ബിജെപി ഗുജറാത്തിൽ ചരിത്ര വിജയം നേടിയതിൽ പ്രധാനമന്ത്രിയെ അഭിനന്ദിക്കുന്ന റോഡ്ഷോയും ഇന്ന് ഡൽഹിയിൽ നടക്കും.
കേന്ദ്ര സർക്കാരിന്റെയും പാർട്ടിയുടെയും വിജയഗാഥകളും നേട്ടങ്ങളും പ്രദർശിപ്പിക്കുമെന്ന് താവ്ഡെ പറഞ്ഞു. ഇതിനായി ആറ് വിഷയങ്ങളാണ് തിരഞ്ഞെടുത്തിരിക്കുന്നത്. രക്തദാന ക്യാമ്പുകൾ, സാമൂഹിക നീതിയ്ക്കും പരിസ്ഥിതി സംരക്ഷണത്തിനും വേണ്ടി പാർട്ടി നടത്തുന്ന പരിപാടികൾ തുടങ്ങിയവയുടെ പ്രദർശനം ദ്വിദിന ക്യാമ്പിനോടനുബന്ധിച്ചുണ്ടാകും.
വിശ്വ ഗുരു ഭാരത് പ്രമേയത്തിൽ യോഗയ്ക്ക് ഉണ്ടായ ജനപ്രീതിയും അന്താരാഷ്ട്ര യോഗ ദിനം രാജ്യം ആഘോഷിക്കുന്ന രീതിയും പാർട്ടി പ്രദർശിപ്പിക്കും. കൊറോണ മഹാമാരി കാലത്തെ പ്രവർത്തനങ്ങൾ, വാക്സിൻ യജ്ഞം, ജി20 അദ്ധ്യക്ഷസ്ഥാനം ഏറ്റെടുക്കൽ , ഉച്ചകോടിയുടെ പദ്ധതികൾ തുടങ്ങിയവയും പ്രദർശനത്തിലുണ്ടാകുമെന്ന് അദ്ദേഹം പറഞ്ഞു. സാമ്പത്തികം, രാഷ്ട്രീയം, പാവപ്പെട്ടവരുടെ ക്ഷേമം, ജി20 അദ്ധ്യക്ഷ പദവി എന്നിവയുമായി ബന്ധപ്പെട്ട് പ്രമേയങ്ങൾ പാസാക്കും. കേന്ദ്ര സർക്കാർ പദ്ധതികൾ പാവപ്പെട്ടവരിലെത്തുന്നത് സംബന്ധിച്ച് അവലോകനം നടത്തും.
