സോഷ്യൽ മീഡിയയിൽ സജീവമാണ് നടിയും നർത്തകിയുമായ മാളവിക കൃഷ്ണദാസ്. റിയാലിറ്റി ഷോകളിലൂടെ ടെലിവിഷൻ രംഗത്തേക്ക് കടന്നുവന്ന മാളവിക നായികാ നായികൻ എന്ന ഷോയിലൂടെയാണ് കൂടുതൽ പ്രശസ്തയാവുന്നത്. ഇപ്പോൾ പരമ്പരകളിലും ടിവി ഷോകളിലും സമൂഹമാദ്ധ്യമങ്ങളിലുമെല്ലാം സജീവമായ നടിയുടെ വിവാഹ വിശേഷങ്ങളാണ് മലയാളികൾക്കിടയിൽ ചർച്ചയാവുന്നത്.
നായികാ നായികൻ എന്ന ഷോയിൽ സഹതാരമായിരുന്ന തേജസുമായാണ് മാളവികയുടെ വിവാഹം ഉറപ്പിച്ചിരിക്കുന്നത്. തേജസുമായി നേരത്തെ പരിചയമുണ്ടെങ്കിലും വീട്ടുകാർ പറഞ്ഞുറപ്പിച്ച വിവാഹമാണിതെന്ന് മാളവിക വ്യക്തമാക്കിയിരുന്നു. തുടർന്ന് തന്റെ യൂട്യൂബ് ചാനലിലൂടെ പെണ്ണുകാണൽ ചടങ്ങും മറ്റ് വിശേഷങ്ങളും നടി പങ്കുവയ്ക്കുകയും ചെയ്തു.
ഇതിന് ശേഷം മാളവിക പങ്കുവച്ച വീഡിയോ നടിയുടെ ആരാധകർ മാത്രമല്ല, സോഷ്യൽ മീഡിയ മുഴുവൻ ചർച്ചയായിരിക്കുകയാണ്. ‘ചെക്കൻ കാണൽ’ എന്ന തലക്കെട്ടോടെയാണ് നടി വീഡിയോ പങ്കുവച്ചത്. വിവാഹമുറപ്പിച്ചതിന് ശേഷം മാളവികയുടെ വീട്ടിലേക്ക് പയ്യനും വീട്ടുകാരും വന്ന് കണ്ടത് പോലെ തേജസിന്റെ വീട്ടിലേക്ക് മാളവികയും കുടുംബവും ചെല്ലുന്നതായിരുന്നു വീഡിയോയിലുണ്ടായിരുന്നത്.
സാധാരണയായി വിവാഹമുറപ്പിച്ചു കഴിഞ്ഞാൽ പെൺകുട്ടികൾ വരന്റെ വീട്ടിലേക്ക് പോകാറില്ല. പെൺകുട്ടിയുടെ വീട്ടുകാർ മാത്രമാണ് വരന്റെ വീടും സാഹചര്യവും നേരിൽ ചെന്ന് കണ്ട് അന്വേഷിക്കുക. ‘വിവാഹത്തിന് ശേഷം മാത്രം പെൺകുട്ടിയെ ചെക്കന്റെ വീട്ടിലേക്ക് കയറ്റുക’ എന്ന കാലങ്ങളായി തുടരുന്ന ‘നാട്ടുനടപ്പാണ്’ മാളവികയുടെ വീഡിയോ പുറത്തുവന്നതോടെ ചർച്ചയാവുന്നത്.
വിവാഹത്തിന് ശേഷം താമസിക്കാൻ പോകുന്ന വീടും പരിസരവും കാണാൻ ഏറ്റവും അർഹതപ്പെട്ടയാൾക്ക് ഒഴികെ ബാക്കിയെല്ലാവർക്കും അവസരം ലഭിക്കുന്നുവെന്നതാണ് കേരളത്തിലെ ‘സോ കോൾഡ് നാട്ടുനടപ്പ്’. കാലം മാറിയിട്ടും, വിദ്യാസമ്പന്നരായ തലമുറ വന്നിട്ടും ഇക്കാര്യത്തിൽ പരിഷ്കാരം വന്നില്ലെന്നതാണ് യാഥാർത്ഥ്യം.
പ്രബുദ്ധത നാഴികയ്ക്ക് നാല്പതുവട്ടം വിളിച്ചോതുന്ന മലയാളികൾ ഇപ്പോഴും പയ്യന്റെ വീട് വിവാഹത്തിന് മുമ്പ് വധു കാണുന്നതിന് എതിരാണ്. സെലിബ്രിറ്റികൾക്കിടയിലും സമ്പന്നർക്കിടയിലും മാത്രം ഇത്തരം മാറ്റങ്ങൾ വന്നുതുടങ്ങിയാൽ മതിയോ എന്നും സാധാരണക്കാർക്കിടയിൽ ഈ മാറ്റം എന്ന് വന്നുതുടങ്ങുമെന്നും സോഷ്യൽ മീഡിയയിൽ ചർച്ചയാവുകയാണ്. തന്റെ സബ്സ്ക്രൈബേഴ്സിനും ആരാധകർക്കും വേണ്ടി മാളവിക കൃഷ്ണദാസ് പങ്കുവച്ചതായിരുന്നു വീഡിയോ എങ്കിലും ചെക്കന്റെ വീടുകാണലിനെ കുറിച്ച് കേരളം മുഴുവൻ ചിന്തിച്ചുകൊണ്ടിരിക്കുകയാണ്.
