ഇൻസ്റ്റന്റ് മെസേജിങ്ങിനായി ഏറ്റവുമധികമാളുകൾ ഉപയോഗിക്കുന്ന ഒന്നാണ് വാട്സ്ആപ്പ്. മെറ്റയുടെ ഉടമസ്ഥതയിലുള്ള വാട്സ്ആപ്പ് ഒരു യൂസർ ഫ്രണ്ട്ലി ആപ്പ് ആയതുകൊണ്ട് തന്നെ ലോകത്തിലേറ്റവും ആരാധകരുള്ള ആപ്ലിക്കേഷൻ കൂടിയാണ്.
മെസേജ് അയക്കുക എന്നതിലുപരി ഫോട്ടോകളും വീഡിയോകളും ഡോക്യുമെന്റുകളും പങ്കുവയ്ക്കാനും വോയ്സ്-വീഡിയോ കോളുകൾ ചെയ്യാനും വാട്സ്ആപ്പ് ഉപയോഗിക്കുന്നു. ഇതുകൂടാതെ ഇഷ്ടപ്പെട്ട ചിത്രങ്ങളും വീഡിയോകളും സ്റ്റാറ്റസ് ആക്കി പോസ്റ്റ് ചെയ്യാനുള്ള ഓപ്ഷനും വാട്സ്ആപ്പിലുണ്ട്. 24 മണിക്കൂർ മാത്രം നീണ്ടുനിൽക്കുന്ന ഇത്തരം സ്റ്റാറ്റസുകൾ ദിവസവും ഇടാൻ ശ്രമിക്കുന്നവരാണ് നമ്മളിൽ പലരും. ഇപ്പോഴിതാ സ്റ്റാറ്റസ് ഇടുന്നവർക്ക് വേണ്ടി പുതിയ ഫീച്ചർ ഒരുക്കിയിരിക്കുകയാണ് വാട്സ്ആപ്പ്.
പേഴ്സണൽ മേസേജുകളായി നാം അയയ്ക്കുന്ന വോയ്സ്നോട്ടുകളും വാട്സ്ആപ്പ് സ്റ്റാറ്റസായി ഇടാനുള്ള ഓപ്ഷനാണ് മെറ്റ പരീക്ഷിക്കുന്നത്. വോയ്സ് റെക്കോർഡ് ചെയ്ത് അപ്പോൾ തന്നെ സ്റ്റാറ്റസ് ആക്കുന്നതിനുള്ള ഫീച്ചറാണ് നിലവിൽ വരിക. 30 സെക്കൻഡ് ദൈർഘ്യമുള്ള വോയ്സ്നോട്ടാണ് സ്റ്റാറ്റസ് ആക്കാൻ കഴിയുകയെന്നാണ് റിപ്പോർട്ട്.
നിലവിൽ ആൻഡ്രോയ്ഡ് 2.23.2.8 ന് വേണ്ടിയുള്ള വാട്സ്ആപ്പ് ബീറ്റാ വേർഷനിൽ പുതിയ സൗകര്യം ലഭ്യമായി തുടങ്ങിയിട്ടുണ്ടെന്നാണ് വിവരം. വൈകാതെ എല്ലാ വാട്സ്ആപ്പ് ഉപയോക്താക്കൾക്കും പുതിയ ഫീച്ചർ ലഭ്യമായി തുടങ്ങും.
Comments