തിരുവനന്തപുരം: ഗവർണറുടെ നയപ്രഖ്യാപന പ്രസംഗത്തിനിടെ പ്രതിപക്ഷത്തിന്റെ പ്രതിഷേധം. ഗവർണർ -സർക്കാർ ഭായ് ഭായ് എന്ന് മുദ്രാവാക്യം ഉയർത്തിയായിരുന്നു പ്രതിഷേധം. സർക്കാരിനെയും ഗവർണറെയും വിമർശിച്ച് പ്ലക്കാർഡുകളും പ്രതിപക്ഷം സഭയിൽ ഉയർത്തിക്കാട്ടി.
”സർക്കാർ – ഗവർണർ ഒത്തുകളി, ഗവർണർ – സർക്കാർ ഭായ് ഭായ്, ആർഎസ്എസ് നോമിനിയുമായി ഒത്തുതീർപ്പുണ്ടാക്കി പിണറായി സർക്കാർ, കശ്മീരിലെ തേയിലയ്ക്ക് സ്വാദ് കൂടും.. ഒത്തുതീർപ്പിന് വേഗത കൂടും.”എന്നീ മുദ്രാവാക്യങ്ങളാണ് പ്ലക്കാർഡുകളിൽ പ്രദർശിപ്പിച്ചിരിക്കുന്നത്.
സഭയിൽ നയപ്രഖ്യാപന പ്രസംഗം പുരോഗമിക്കുകയാണ്. വ്യവസായത്തിലും നിക്ഷേപങ്ങളിലും സംസ്ഥാനം മുന്നേറുന്നുവെന്നും ആരോഗ്യ,വിദ്യാഭ്യാസ മേഖലകളിലും സംസ്ഥാനം മികവ് പുലർത്തുന്നുവെന്നും പ്രസംഗത്തിൽ പറഞ്ഞു. ഭരണ ഘടന വെല്ലുവിളി നേരിടുന്നുവെന്നും ഭരണ ഘടനയെ സംരക്ഷിക്കാൻ സർക്കാർ പ്രതിജ്ഞാബദ്ധമാണെന്നും ഗവർണർ വായിച്ചു.
