ലക്നൗ: ആഗോള നിക്ഷേപക ഉച്ചകോടിയിലേക്ക് നിക്ഷേപകരെ ക്ഷണിച്ച് യുപി സർക്കാർ. യോഗി ആദിത്യനാഥിന്റെ നേതൃത്വത്തിലുള്ള സംഘമാണ് ബംഗളൂരുവിൽ നിന്നുള്ള നിക്ഷേപകരെ ക്ഷണിച്ചത്. ഉത്തർപ്രദേശിലെ ലക്നൗവിൽ വച്ചാണ് ജിഐഎസ്-2023 നടക്കുന്നത്. ഫെബ്രുവരി 10 മുതൽ 12വരെയാണ് ഉച്ചകോടി നടക്കുക.
ഉത്തർപ്രദേശിൽ വൻതോതിലുള്ള നിക്ഷേപത്തിനുള്ള സാധ്യതകളെയും അവസരങ്ങളെയും കുറിച്ച് ബംഗളൂരുവിലെ വ്യവസായികളെ അറിയിക്കുന്നതിന് വേണ്ടിയാണ് യോഗി സർക്കാർ നിക്ഷേപകരെ ക്ഷണിക്കുന്നത്. സംസ്ഥാനത്തെ നിക്ഷേപ സാധ്യതകളെക്കുറിച്ച് നിക്ഷേപകരെ അറിയിക്കുകയും ഉത്തർപ്രദേശിൽ നിക്ഷേപം നടത്താൻ അവരെ പ്രോത്സാഹിപ്പിക്കുകയും ചെയ്യും. ഉത്തർപ്രദേശ് സർക്കാരിന്റെ ഔദ്യോഗിക പ്രസ്താവനയിലാണ് ഇക്കാര്യങ്ങൾ വ്യക്തമാക്കിയത്.
ജിഐഎസ്-2023ലേക്ക് നിക്ഷേപകരെ ആകർഷിക്കുന്നതിനായി ബംഗുളൂരുവിൽ യുപി സർക്കാർ റോഡ് ഷോ നടത്തും. മുഖ്യമന്ത്രി യോഗി ആദിത്യനാഥിന്റെ നേതൃത്വത്തിലുള്ള സംഘം റോഡ്ഷോയിൽ പങ്കെടുക്കും. ഒപ്പം നിരവധി മന്ത്രിമാരും മുതിർന്ന ഉദ്യോഗസ്ഥരും പ്രമുഖരായ വ്യവസായികളും പങ്കെടുക്കും.
യോഗി ആദിത്യനാഥിന്റെ നേതൃത്വത്തിലുള്ള സംഘത്തിൽ ഉപമുഖ്യമന്ത്രി കേശവ് പ്രസാദ് മൗര്യ, ക്യാബിനറ്റ് മന്ത്രിമാരായ സൂര്യ പ്രതാപ് ഷാഹി, യോഗേന്ദ്ര ഉപാധ്യായ, സഹമന്ത്രിമാരായ ദിനേശ് പ്രതാപ് സിങ്, ഗിരീഷ് ചന്ദ്ര യാദവ്, ചീഫ് സെക്രട്ടറി ദുർഗാ ശങ്കർ മിശ്ര, വ്യവസായ വികസന കമ്മീഷണർ അരവിന്ദ് കുമാർ എന്നിവരാണ് പങ്കെടുക്കുന്നത്.
കുമാർ, ഇൻവെസ്റ്റ് യുപി സിഇഒ അഭിഷേക് പ്രകാശ്, ഐടി-ഇലക്ട്രോണിക്സ് സ്പെഷ്യൽ സെക്രട്ടറി അക്ഷയ് ത്രിപാഠി, യമുന എക്സ്പ്രസ് അതോറിറ്റി (വൈഇഐഡിഎ) സിഇഒ അരുൺവീർ സിങ്, യുപി ഡിഫൻസ് കോറിഡോർ നോഡൽ ഓഫീസർ ആർ.കെ.എസ് ബദൗരിയ എന്നിവർ വ്യവസായികളുമായി സംവദിക്കും.
അതേസമയം ബംഗളൂരുവിൽ മന്ത്രിമാരുടെയും ഉദ്യോഗസ്ഥരുടെയും സംഘം വ്യവസായികൾക്കൊപ്പം 32-ലധികം സംഘടനകളുടെ പ്രതിനിധികളെയും കാണും. വിപ്രോ എന്റർപ്രൈസസ്, ബ്രിട്ടാനിയ ഇൻഡസ്ട്രീസ്, എംകെയു ലിമിറ്റഡ്, ഒല ഇലക്ട്രിക്, കിഷൻ ക്രോഫ്റ്റ് ലിമിറ്റഡ്, ജ്യോതി ലാബ്സ്, ഓറിയന്റ് പ്രസ് ലിമിറ്റഡ്, ബെസ്റ്റ് കോർപ്പറേഷൻ, എംടിആർ ഫുഡ്സ്, ജെആർ ഗ്രൂപ്പ് തുടങ്ങി നിരവധി ഗ്രൂപ്പുകളുടെ പ്രതിനിധികളും റോഡ്ഷോയിൽ പങ്കെടുക്കും.
