ഞാൻ എന്തു ചെയ്താലും പ്രശ്നമാണ്; ട്രോളരുത്, ഞാൻ നിർത്തി പോകണോ?: രശ്മിക മന്ദാന

നിരവധി ആരാധകരും അതേപോലെ വിമർശകരുമുള്ള നടിയാണ് രശ്മിക മന്ദാന. നിഷ്കളങ്കത നിറഞ്ഞ താരത്തിന്റെ മുഖഭാവങ്ങൾ സമൂഹമാദ്ധ്യമങ്ങളിൽ ശ്രദ്ധിക്കപ്പെടാറുണ്ട്. നിരവധി ആരാധകരാണ് ഇത്തരം വീഡിയോകൾക്കുള്ളത്. അതേസമയം തന്നെ, രശ്മികയുടെ മുഖഭാവങ്ങളും ചലനങ്ങളുമെല്ലാം നിഷ്കളങ്കത തോന്നാനും ശ്രദ്ധ പിടിച്ചു പറ്റാനും വേണ്ടി സൃഷ്ടിച്ചെ‌ടുക്കുന്നതാണ് എന്നും ചിലർ വിമർശിക്കുന്നു. ട്രോളുകളിലും നിരന്തരം താരം ഇടം പിടിക്കാറുണ്ട്. രശ്മികയുടെ മുഖ ഭാവങ്ങളും ക്യൂട്ട്നെസും സംസാര ശൈലിയും ആം​ഗ്യങ്ങളുമെല്ലാം ട്രോളുകളിൽ നിറയുന്നു. ഇപ്പോഴിതാ, തന്നെ വിമർശിക്കുന്നവരോടും പരിഹസിക്കുന്നവരോടും അതൃപ്തി അറിയിക്കുകയാണ് താരം. താൻ ജീവിതത്തിൽ ചെയ്യുന്ന എന്തിനെയും ട്രോളുന്നത് ശരിയല്ലെന്നും ശരിയായ രീതിയിൽ വിമർശനം ഉന്നയിച്ചാൽ അത് കേൾക്കാൻ തയ്യാറാണെന്നും നടി തുറന്നു പറഞ്ഞു.

മാദ്ധ്യമ പ്രവർത്തകയായ പ്രേമയുമായി നടത്തിയ അഭിമുഖത്തിലാണ് ട്രോളന്മാർക്കെതിരെ നടി തുറന്നടിച്ചത്. ‘വിജയവും പ്രശസ്തിയും ഉണ്ടായിട്ടും എല്ലാം ഉപേക്ഷിക്കാൻ തോന്നുന്നുണ്ടോ?’ എന്ന ചോദ്യത്തിനാണ് താരത്തിന്റെ മറുപടി. ‘ചിലപ്പോഴൊക്കെ എല്ലാം ഉപേക്ഷിച്ചേക്കാം എന്ന ചിന്ത എന്റെ മനസ്സിൽ കൂടി കടന്നു പോയിട്ടുണ്ട്. ആളുകൾക്ക് എന്റെ ശരീരത്തിന് പ്രശ്‌നമുണ്ട്. ഞാൻ വളരെയധികം ജോലി ചെയ്താൽ, ഞാൻ ഒരു പുരുഷനെപ്പോലെയാണ്. ഞാൻ അധികം വർക്ക് ഔട്ട് ചെയ്തില്ലെങ്കിൽ, ഞാൻ വളരെ തടിച്ചായാകും. ഞാൻ ഒരുപാട് സംസാരിച്ചാൽ അത് അഭിനയമാണെന്ന് പറയും. സംസാരിച്ചില്ലെങ്കിൽ അഹങ്കാരിയാണെന്ന് പറയും. ഞാൻ നല്ലതായി ശ്വസിച്ചാലും ശ്വസിച്ചില്ലെങ്കിലും ജനങ്ങൾക്ക് പ്രശ്നമാണ്. എന്റെ ഭാ​ഗത്ത് നിന്നും എന്ത് വേണമെന്നാണ് പറയുന്നത്. ഞാൻ നിർത്തി പോകണോ?, അതോ ഞാൻ തുടരണോ?’.

Papam ra 🥺 pic.twitter.com/lhSEX6eRKj

— Butcher (@karl__butcher) January 21, 2023

‘എന്നിൽ നിന്ന് എന്ത് മാറ്റമാണ് ആളുകൾ ആഗ്രഹിക്കുന്നത്. അത് കൃത്യമായും വ്യക്തമായും എനിക്ക് പറഞ്ഞു തരൂ. ഞാൻ എന്തുചെയ്യണം? വ്യക്തത വരുത്തൂ. എങ്കിൽ ആളുകളുടെ വാക്കുകൾ ഞാൻ കേൾക്കാം. അതല്ലാതെ പൊതു ഇടങ്ങളിൽ അധിക്ഷേപിക്കരുത്. അത്തരക്കാർ ഉപയോ​ഗിക്കുന്ന വാക്കുകൾ മാനസികമായി എന്ന വളരെയധികം ബാധിക്കുന്നു’ എന്നാണ് അഭിമുഖത്തിൽ രശ്മിക മന്ദാന പറഞ്ഞത്.