പാചകം ചെയ്തുകൊണ്ടിരിക്കുമ്പോൾ പാചകക്കാരന് ദേഷ്യം വന്നാൽ എന്ത് സംഭവിക്കും? തയ്യാറാക്കിക്കൊണ്ടിരിക്കുന്ന വിഭവം മോശമാവാനുള്ള സാധ്യത കൂടുതലാണല്ലേ.. സമാനരീതിയിൽ ഒരു ഹോട്ടൽ ജീവനക്കാരൻ ചെയ്ത പണിയാണ് ഇപ്പോൾ സോഷ്യൽ മീഡിയയിൽ വൈറലാകുന്നത്. അവധി ദിവസത്തെ ശമ്പളവുമായി ബന്ധപ്പെട്ട തർക്കം കലാശിച്ചത് ഹോട്ടലിലെ അടുക്കളയിലേക്ക് ഒരു കൂട്ടം പാറ്റകളെ അഴിച്ചുവിട്ടുള്ള പ്രതികാര നടപടിയിലായിരുന്നുവെന്ന് മാത്രം.
യുകെയിലെ ഒരു റെസ്റ്റോറന്റിലാണ് വിചിത്രമായ സംഭവമുണ്ടായത്. അവധിയെടുത്ത ദിവസത്തെ ശമ്പളം വേണമെന്നായിരുന്നു ഹോട്ടൽ ജീവനക്കാരന്റെ ആവശ്യം. എന്നാൽ ഹോട്ടലുടമ ഇത് അംഗീകരിച്ചില്ല. പ്രകോപിതനായ പാചകക്കാരൻ 20 പാറ്റകളെ കൊണ്ടുവന്ന് ഹോട്ടലിന്റെ അടുക്കളയിലേക്ക് തുറന്നുവിട്ടു. ടോണി വില്യംസ് എന്ന 25-കാരനാണ് അപൂർവ്വമായ രീതിയിൽ പ്രതികാര നടപടി ചെയ്തത്. സംഭവത്തിൽ ഇയാളെ പോലീസ് അറസ്റ്റ് ചെയ്തിട്ടുണ്ട്.
ഹോട്ടലുടമയുമായി തർക്കം തുടങ്ങിയപ്പോൾ തന്നെ ജീവനക്കാരനായ ടോണി പാറ്റകളെ വച്ച് പ്രതികാരം ചെയ്യുമെന്ന് ഭീഷണിപ്പെടുത്തിയിരുന്നു. രണ്ട് ദിവസത്തിന് ശേഷം ഇയാൾ ഭീഷണിപ്പെടുത്തിയ പ്രകാരം റെസ്റ്റോറന്റിലെത്തുകയും പാറ്റകളെ അടുക്കളയിലേക്ക് തുറന്നുവിടുകയും ചെയ്തു. ഇതിന്റെ സിസിടിവി ദൃശ്യങ്ങളും പുറത്തുവന്നു.
പാമ്പുകൾക്കും മറ്റ് ജീവികൾക്കും ആഹാരമായി നൽകുന്ന പ്രത്യേകത തരം പാറ്റകളാണ് പ്രതി ഇതിനായി ഉപയോഗിച്ചത്. സംഭവത്തിന് പിന്നാലെ ഉപഭോക്താക്കളുടെ സുരക്ഷയെ മുൻനിർത്തി റെസ്റ്റോറന്റ് അടച്ചിട്ടു. കോടതിയിൽ ഹാജരാക്കിയ പ്രതിയെ 17 മാസത്തെ ജയിൽവാസത്തിന് ശിക്ഷിക്കുകയും രണ്ട് വർഷം ജോലിയിൽ നിന്ന് പുറത്താക്കുകയും ചെയ്തു.
