ചക്ക! മലയാളികൾക്ക് ഏറെ പ്രിയപ്പെട്ട പഴമാണിത്. ചക്ക പായസം മുതൽ ചക്ക കൂട്ടാൻ വരെ നാം തയ്യാറാക്കും. ചക്ക വറുത്തതിനും ചക്ക വരട്ടിയതിനുമുള്ള ആരാധകരും ചെറുതല്ല. ചക്ക സീസണായി കഴിഞ്ഞാൽ സകല മലയാളികളുടെയും വീട്ടിൽ പിന്നെ ചക്കയാണ് താരം. അടുക്കളയിൽ ചക്ക വിഭവങ്ങളുടെ വിളയാട്ടമായിരിക്കും പിന്നീട് സംഭവിക്കുക.
അത്രമേൽ പ്രിയങ്കരമായ ചക്ക തിന്നുമ്പോൾ ശ്രദ്ധിക്കേണ്ട ചില കാര്യങ്ങളുണ്ട്. ചക്ക വയറുനിറയെ കഴിച്ചുകഴിഞ്ഞാൽ തൊട്ടുപിന്നാലെ വെള്ളം കുടിക്കരുതെന്നാണ് പഴമക്കാരുടെ ചൊല്ല്. അതെന്തേ എന്ന് നാം ചിന്തിച്ചിരിക്കാം. ചക്ക അകത്താക്കിയതിന് ശേഷം വെള്ളം കുടിച്ചാൽ പണി പാളുമെന്നാണ് മുതിർന്നവർ പറയുക. ഇതിൽ സത്യമുണ്ടോ?
ഉണ്ടെന്നതാണ് യാഥാർത്ഥ്യം. പാകം ചെയ്യാത്ത ചക്ക അതുപോലെ തന്നെ അകത്താക്കി കഴിഞ്ഞാൽ തൊട്ടുപിന്നാലെ വെള്ളം കുടിക്കരുത്. ഇത് ദഹനസംബന്ധമായ നിരവധി പ്രശ്നങ്ങളുണ്ടാക്കുമെന്ന് ആരോഗ്യവിദഗ്ധർ ചൂണ്ടിക്കാട്ടുന്നു. ചിലരിൽ വയറിളക്കമുണ്ടാകാനും സാധ്യതയുണ്ട്. അതിനാൽ ചക്ക കഴിച്ചാൽ ഒരിടവേളയെടുത്തതിന് ശേഷം മാത്രം വെള്ളം കുടിക്കുക. അതുപോലെ ചക്ക തിന്നുന്നതിനൊപ്പം പാൽ കുടിക്കുകയും ചെയ്യരുത്. അതും ദഹനത്തെ ബാധിച്ചേക്കാം. ചിലരിൽ ചർമ്മരോഗങ്ങൾ പോലും ഉണ്ടാകാൻ സാധ്യതയുണ്ട്. ചക്ക കഴിക്കുമ്പോൾ ചക്ക മാത്രം അകത്താക്കുന്നതാണ് നല്ലത്. ഒരുമണിക്കൂറിന് ശേഷം മറ്റ് ആഹാരപദാർത്ഥങ്ങൾ കഴിക്കുന്നത് ദോഷം ചെയ്യില്ല.
