അഹമ്മദാബാദ്: അഹമ്മദാബാദ് -ഡൽഹി വിമാനത്തിൽ ബോംബ് ഉള്ളതായി വ്യാജ ഭീഷണി സന്ദേശം. അഹമ്മദാബാദ് വിമാനത്താവളത്തിൽ കഴിഞ്ഞ ദിവസമാണ് അജ്ഞാതന്റെ ബോംബ് ഭീഷണി സന്ദേശം എത്തിയത്. സന്ദേശത്തെ തുടർന്ന് പോലീസും ബോംബ് സ്ക്വാഡും വിമാനത്താവളത്തിലെത്തി പരിശോധന ആരംഭിച്ചു. എന്നാൽ സംശയാസ്പദമായി യാതൊന്നും കണ്ടെത്താനായില്ല.
വൈകിട്ട് 5.20 ന് പുറപ്പെടേണ്ട വിമാനത്തിൽ ഒരു യാത്രാക്കാരൻ എത്താൻ വൈകിയതിനെ തുടർന്ന് എയർപ്പോർട്ട് അധികൃതർ അയാളെ ഫോണിൽ ബന്ധപ്പെട്ടിരുന്നു. തുടർന്നുള്ള ഫോൺ സംഭാഷണത്തിലാണ് അയാൾ ബോംബ് ഭീഷണി മുഴക്കിയതെന്ന് എയർപ്പോർട്ട് ഉദ്യോഗസ്ഥർ പറഞ്ഞു.
വിമാനത്താവള അധികൃതർ പോലീസിൽ വിവരമറിയിച്ചതിനെതുടർന്ന് വിമാനത്തിനുളളിൽ പരിശോധനയ്ക്കെത്തിയ പോലിസിനെയും ബോംബ് സ്ക്വാഡിനെയും കണ്ടതോടെ യാത്രക്കാർ പരിഭ്രാന്തരായി. പരിശോധനയെ തുടർന്ന് മണിക്കൂറുകൾ വൈകിയാണ് വിമാനം സർവ്വീസ് ആരംഭിച്ചത്. ടിക്കറ്റ് ബുക്ക് ചെയ്ത ഇമെയിൽ വിലാസത്തിൽ ബന്ധപ്പെട്ടെങ്കിലും അജ്ഞാത ഫോൺ സന്ദേശത്തിനുടമയെ ഇതുവരെ കണ്ടെത്താനായിട്ടില്ല. വ്യാജ ബോംബ് സന്ദേശം നൽകിയയാൾക്കെതിരെ നിയമ നടപടികൾ തുടങ്ങിയതായി അഹമ്മദാബാദ് പോലീസ് അറിയിച്ചു.
Comments