ന്യൂഡൽഹി: സ്വന്തമായി വാഹനം ഓടിക്കാത്ത ദിവ്യാംഗൻമാർക്കും ഇനി ‘ ദിവ്യാംഗൻ’ വിഭാഗത്തിൽ വാഹനം രജിസ്റ്റർ ചെയ്യാം. കേന്ദ്ര ഉപരിതല ഗതാഗത മന്ത്രാലയമാണ് ഇത് സംബന്ധിച്ച നിർദ്ദേശം സംസ്ഥാനങ്ങൾക്ക് നൽകിയത്. ഇത്തരം വാഹനങ്ങളുടെ രജിസ്ട്രേഷൻ സംബന്ധിച്ച് നിരവധി പരാതികൾ ഉയർന്ന സാഹചര്യത്തിലാണ് മന്ത്രാലയം പുതിയ ഉത്തരവ് ഇറക്കിയത്. പഴയ വാഹനങ്ങൾക്കും ഈ വിഭാഗത്തിലേക്ക് പുനർ രജിസ്ട്രേഷൻ നടത്താം.
സ്വന്തമായി വാഹനം ഓടിച്ചിരുന്ന ദിവ്യാംഗൻമാർ മാത്രമാണ് ഇത്രയും കാലം ഈ വിഭാഗത്തിൽ ഉൾപ്പെട്ടിരുന്നത്. എന്നാൽ ഇനി ഡ്രൈവറെ വെച്ച് സ്വന്തം വാഹനത്തിൽ യാത്രചെയ്യുന്നവർക്കും ആനുകൂല്യം ലഭിക്കും. കൂടാതെ വാഹനം രൂപമാറ്റം വരുത്തണമെന്ന നിബന്ധനയും ഒഴിവാക്കിയിട്ടുണ്ട്. ദിവ്യാംഗൻ വിഭാഗത്തിൽ ഉൾപ്പെടുന്ന വാഹനങ്ങൾക്ക് ജിഎസ്ടി, റോഡ് നികുതി, ടോൾ എന്നിവയിൽ ഇളവുകളുണ്ട്.
ഇത്തരം വാഹങ്ങളുടെ രജിസ്ട്രേഷൻ സംബന്ധിച്ച മാർഗനിർദ്ദേശങ്ങളും മന്ത്രാലയത്തിന്റെ ഉത്തരവിൽ ഉൾപ്പെടുത്തിയിട്ടുണ്ട്. 40 ശതമാനത്തിൽ കൂടുതൽ ശാരീരിക വെല്ലുവിളി നേരിടുന്നവർക്ക് ഈ വിഭാഗത്തിൽ രജിസ്റ്റർ ചെയ്യാം. അപകടം, രോഗങ്ങൾ എന്നിവ കൊണ്ട് ശാരീരിക ബുദ്ധിമുട്ടുകൾ അനുഭവിക്കുന്നവർക്കും ദിവ്യാംഗൻ വിഭാഗത്തിൽ വാഹനങ്ങൾ ഉൾപ്പെടുത്താൻ ആവശ്യപ്പെടാം. ദിവ്യാംഗനായ വ്യക്തിയുടെ വാഹനം ഓടിക്കുന്നയാൾക്ക് നിയമപരമായ ഡ്രൈവിംഗ് ലൈൻസ് ഉണ്ടായിരിക്കണമെന്നും ഉത്തരവിൽ പറയുന്നു.
