ന്യൂഡൽഹി: പ്രശസ്ത തെലുങ്ക് സംവിധായകൻ കെ. വിശ്വനാഥിന്റെ വിയോഗത്തിൽ പ്രധാനമന്ത്രി നരേന്ദ്രമോദി അനുശോചനം രേഖപ്പെടുത്തി. സർഗ്ഗാത്മക ചിന്തകളോട് കൂടിയ ബഹുമുഖ പ്രതിഭാധനനും സംവിധാനമേഖലയിൽ വേറിട്ടശൈലി സിനിമലോകത്തിന് പരിചയപ്പെടുത്തി കൊടുത്ത അഗ്രഗണ്യനായ വ്യക്തിത്വത്തിനുടമയും ആയിരുന്നു വിശ്വനാഥനെന്നും പതിറ്റാണ്ടുകളായി വിവിധ വിഭാഗങ്ങളെ ഉൾക്കൊള്ളിച്ചുകൊണ്ടുള്ള അദ്ദേഹത്തിന്റെ സിനിമകൾ പ്രേക്ഷകരെ ആകർഷിക്കുകയും ചെയ്തിരുന്നുവെന്ന് പ്രധാനമന്ത്രി ട്വിറ്ററിൽ കുറിച്ചു.
Saddened by the passing away of Shri K. Viswanath Garu. He was a stalwart of the cinema world, distinguishing himself as a creative and multifaceted director. His films covered various genres and enthralled audiences for decades. Condolences to his family and admirers. Om Shanti.
— Narendra Modi (@narendramodi) February 3, 2023
ഫെബ്രുവരി രണ്ടിന് ഹൈദരാബാദിലെ വസതിയിലായിരുന്നു കെ വിശ്വനാഥിന്റെ അന്ത്യം. 92 വയസ്സായിരുന്നു. ശങ്കരാഭരണം, സാഗര സംഗമം, സ്വാതി മുത്യം, സ്വർണ കമലം തുടങ്ങി രാജ്യമൊട്ടാകെ ശ്രദ്ധേയമായ ചിത്രങ്ങളിൽ വ്യക്തിമുദ്ര പതിപ്പിച്ച ചലച്ചിത്രകാരനായിരുന്നു അദ്ദേഹം. 5 തവണ ദേശീയ അവാർഡ് നൽകി രാജ്യം ആദരിച്ചിട്ടുണ്ട്. കഴിഞ്ഞ ദിവസം പ്രിയ സംവിധായകന്റെ വിയോഗത്തിൽ സിനിമാ രംഗത്തുള്ളവരും രാഷ്‌ട്രീയസാമൂഹിക രംഗത്തെ പ്രമുഖരും അനുശോചനം രേഖപ്പെടുത്തിയിരുന്നു.
