മുംബൈ: മദ്യലഹരിയിൽ ഭാര്യയെ മർദ്ദിച്ചെന്ന പരാതിയിൽ ക്രിക്കറ്റ് താരം വിനോദ് കാംബ്ലിയ്ക്കെതിരെ കേസ്. രണ്ട് മക്കളുടെ മുന്നിൽ വെച്ച് ഭാര്യ ആൻഡ്രിയയെ മർദ്ദിച്ചെന്നാണ് പരാതി. ബാന്ദ്ര പോലീസാണ് താരത്തിനെതിരെ കേസെടുത്തത്.
വീട്ടിലിരുന്ന് മദ്യപിച്ച കാംബ്ലി ആഡ്രിയയോട് മോശമായി പെരുമാറിയെന്നും പിന്നീട് ആക്രമിക്കുകയായിരുന്നുവെന്നും പരാതിയിൽ പറയുന്നു. കറിച്ചട്ടിയുടെ കൈപ്പിടി എറിഞ്ഞ് തലയ്ക്ക് പരിക്കേറ്റെന്നും തുടർന്ന് ബാറ്റ് കൊണ്ട് അടിക്കാൻ ശ്രമിക്കവേ മക്കളെയും വിളിച്ച് വീടുവിട്ടിറങ്ങുകയായിരുന്നുവെന്ന് ആൻഡ്രിയ പറയുന്നു.
വീട് വിട്ടിറങ്ങി ബാന്ദ്രയിലെ ആശുപത്രിയിൽ ചികിത്സ തേടുകയായിരുന്നു. ഇതിനിടയിലാണ് ആൻഡ്രിയ പോലീസിൽ മൊഴി നൽകിയത്. മെഡിക്കൽ റിപ്പോർട്ടിന്റെ പകർപ്പും പരാതിയ്ക്കൊപ്പം നൽകിയിട്ടുണ്ട്. ഇന്ത്യൻ ശിക്ഷാ നിയമത്തിലെ സെക്ഷൻ 324,504 എന്നിവ പ്രകാരമാണ് കാംബ്ലിയ്ക്കെതിരെ കേസെടുത്തിരിക്കുന്നത്. എന്നാൽ സംഭവത്തിൽ ഇതുവരെ അറസ്റ്റ് രേഖപ്പെടുത്തിയിട്ടില്ല.
Comments