വിവാഹചിത്രങ്ങൾ പുറത്തുവന്നതിന് പിന്നാലെ രൂക്ഷമായി പ്രതികരിച്ച് പാകിസ്താൻ യുവ ക്രിക്കറ്റ് താരം ഷഹീൻ അഫ്രീദി. കഴിഞ്ഞ ദിവസം കറാച്ചിയിൽ നടന്ന ചടങ്ങിലാണ് ഷഹീൻ അഫ്രീദിയും പാകിസ്താൻ ക്രിക്കറ്റ് ടീം മുൻ ക്യാപ്റ്റൻ ഷാഹിദ് അഫ്രീദിയുടെ മകൻ അൻഷയും വിവാഹിതരായത്.ഷഹീൻ അഫ്രീദി വിവാഹ ചിത്രങ്ങൾ സമൂഹമാദ്ധ്യമങ്ങളിൽ പങ്കുവെയ്ക്കും മുൻപേ താരത്തിന്റെയും അൻഷയുടേയും ചിത്രങ്ങൾ വൈറലായിരുന്നു. ഇതാണ് താരത്തെ പ്രകോപിതനാക്കിയത്.
ചിത്രം പ്രചരിച്ചവർ തന്റെയും ഭാര്യയുടേയും കുടുംബത്തിന്റെയും സ്വകാര്യതയെ ഹനിക്കുകയാണ് ചെയ്തതെന്ന് ഷഹീൻ അഫ്രീദി ട്വിറ്ററിൽ കുറിച്ചു. വളരെ കുറച്ച് അതിഥികൾ മാത്രം പങ്കെടുത്ത വിവാഹ ചടങ്ങിൽ മൊബൈൽ ഫോൺ ഓഫ് ചെയ്ത് വെയ്ക്കണമെന്നും പ്രത്യേകം നിർദ്ദേശമുണ്ടായിരുന്നു. എന്നിട്ടും വിവാഹ ചിത്രങ്ങൾ എങ്ങനെയാണ് ചോർന്നതെന്ന് വ്യക്തമല്ല.
‘ചിത്രങ്ങൾ പ്രചരിപ്പിക്കരുതെന്ന് അഭ്യർഥിച്ചിട്ടും ഞങ്ങളുടെ സ്വകാര്യത നഷ്ടപ്പെട്ടത് ആശങ്കയുണ്ടാക്കുന്ന കാര്യമാണ്. ആളുകൾ കുറ്റബോധമില്ലാതെ ചിത്രങ്ങൾ പങ്കുവെയ്ക്കുന്നത് തുടരുകയാണ്. എല്ലാവരും ഞങ്ങളോട് സഹകരിക്കണമെന്ന് വീണ്ടും അഭ്യർത്ഥിക്കുകയാണ്. ഞങ്ങളുടെ ജീവിതത്തിലെ മനോഹരമായൊരു ദിവസം നശിപ്പിക്കരുത്’ -ഷഹീൻ ട്വിറ്ററിൽ പറയുന്നു.
കറാച്ചിയിൽ നടന്ന വിവാഹത്തിൽ പാകിസ്താൻ ക്രിക്കറ്റ് താരങ്ങളായ ശതബ് ഖാൻ, ബാബർ അസം, ഫഖർ സമാൻ, സർഫറാസ് അഹമ്മദ് തുടങ്ങിയവർ പങ്കെടുത്തിരുന്നു. ട്വന്റി20 ലോകകപ്പിനിടെ പരിക്കേറ്റ ഷഹീൻ അഫ്രീദി തിരിച്ചുവരവിനുള്ള ഒരുക്കത്തിലാണ്. ആഭ്യന്തര ക്രിക്കറ്റ് ലീഗായ പാകിസ്താൻ സൂപ്പർ ലീഗിൽ താരം കളിക്കും.
