ന്യൂഡൽഹി: ഇന്ത്യയിലെ യുവജനങ്ങൾക്ക് അസാദ്ധ്യമായത് ഒന്നുമില്ലെന്ന് പ്രധാനമന്ത്രി നരേന്ദ്ര മോദി. കായിക മേഖലയിൽ രാജ്യത്ത് യുവാക്കൾക്ക് നല്ലൊരു ഭാവിയുണ്ടെന്നും അദ്ദേഹം പറഞ്ഞു. കൂടാതെ ടോപ്സ് (ടാർഗെറ്റ് ഒളിമ്പിക് പോഡിയം സ്കീം) പോലുള്ള സംരംഭങ്ങൾ യുവാക്കൾക്ക് വലിയ കായിക മത്സരങ്ങളിൽ പങ്കെടുക്കാൻ സഹായകമാകുന്നും അദ്ദേഹം കൂട്ടി ചേർത്തു. ഇന്ന് രാവിലെ വീഡിയോ കോൺഫറൻസിംഗ് വഴി ജയ്പൂർ കായിക മേള ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
രാജസ്ഥാന്റെ കായിക പ്രതിഭകളുടെ ആഘോഷമാണ് ജയ്പൂർ മഹാഖേൽ. ജനുവരി 12-ന് ദേശീയ യുവജനദിനത്തിനോട് അനുബന്ധിച്ചാണ് കായിക മേളയ്ക്ക് ജയ്പൂരിൽ തുടക്കമായത്. സംസ്ഥാനത്തെ ആറായിരത്തിലധികം യുവാക്കളാണ് കായിക മേളയിൽ പങ്കെടുത്തത്.
സംസ്ഥാനത്ത് നിന്നുള്ള ലോക്സഭ എംപി രാജ്യവർദ്ധൻ സിംഗിന്റെ നേതൃത്വത്തിലാണ് കായിക മേള സംഘടിപ്പിച്ചത്. യുവാക്കളെ കായിക മേഖലയിലേക്ക് ആകർഷിക്കുകയും തൊഴിലായി തിരഞ്ഞെടുക്കാൻ പ്രേരിപ്പിക്കുകയുമാണ് മഹാഖേൽ ലക്ഷ്യം വെയ്ക്കുന്നത്. യുവാക്കളുടെ കായികപരമായ കഴിവുകൾ പ്രോത്സാഹിപ്പിക്കുന്നതിനായാണ് ‘ജയ്പൂർ മഹാഖേൽ’ നടത്തുന്നത്. ഈ വർഷത്തെ കായിക മേള കബഡി കേന്ദ്രീകരിച്ചാണ് നടത്തിയത്.
Comments