കൽപ്പറ്റ: മോഹൻലാൽ നായകനായ ഫോട്ടോഗ്രാഫർ എന്ന ചിത്രത്തിലൂടെ മികച്ച ബാലതാരത്തിനുള്ള സംസ്ഥാന പുരസ്കാരം സ്വന്തമാക്കുകയും മലയാളികളുടെ ഹൃദയം കീഴടക്കുകയും ചെയ്ത നടനാണ് വയനാട്ടിലെ വനവാസി സമൂഹത്തിൽ നിന്നുള്ള മണി. എന്നാൽ, ജീവിതത്തിൽ പ്രാരാബ്ധങ്ങൾ കുന്നുകൂടിയതോടെയും സിനിമയിൽ അവസരങ്ങൾ തേടിയെത്താത്തതോടെയും കൂലിപ്പണി ചെയ്യുകയാണ് നടൻ ഇപ്പോൾ. ആരാലും അറിയാതെ കിടന്ന മണിയുടെ ജീവിതം മലയാളികൾക്ക് മുന്നിൽ എത്തിച്ചത് യുവമോർച്ച ദേശീയ സെക്രട്ടറി പി ശ്യാംരാജ് ആണ്. മണിയുമായുള്ള കൂടിക്കാഴ്ചയ്ക്ക് ശേഷം നടന്റെ ജീവിതം ശ്യാംരാജ് ഫേയ്സ്ബുക്ക് കുറിപ്പിലൂടെ തുറന്നു കാട്ടുകയായിരുന്നു.
ഇപ്പോഴിതാ, ശ്യാം രാജ് ഫേയ്സ്ബുക്കിൽ പങ്കുവെച്ച കുറിപ്പിന് പിന്നാലെ മണിയ്ക്ക് സിനിമയിൽ അവസരം നൽകാൻ നിരവധി പേർ രംഗത്തു വന്നിരിക്കുകയാണ്. യുവമോർച്ച നേതാവ് തന്നെയാണ് ഇക്കാര്യവും വെളിപ്പെടുത്തിയിരിക്കുന്നത്. ‘കഴിഞ്ഞ ദിവസം നടൻ മണിയുടെ വിശേഷങ്ങളെക്കുറിച്ച് എഴുതിയിരുന്നു. അതിനെ തുടർന്ന് സിനിമ രംഗത്ത് പ്രവർത്തിക്കുന്ന ചില ആളുകൾ വിളിച്ചിരുന്നു. മലയാളത്തിലെ ഒരു സൂപ്പർ ഹിറ്റ് സംവിധായകനുൾപ്പെടെ ചിലർ തങ്ങളുടെ വരാൻ പോകുന്ന പ്രൊജക്ടുകളിൽ മണിയ്ക്ക് നല്ല വേഷങ്ങൾ നൽകാമെന്ന് അറിയിച്ചിട്ടുണ്ട്. സന്തോഷം. വരും നാളുകളിൽ വെള്ളിത്തിരയുടെ അഭ്രപാളികളിൽ തീർച്ചയായും മണിയുടെ പ്രകടനങ്ങൾ കാണാൻ കഴിയും. ഹൃദയം നിറഞ്ഞ ആശംസകൾ’- എന്നാണ് ശ്യാം രാജ് ഫേയ്സ്ബുക്കിൽ കുറിച്ചിരിക്കുന്നത്.
ശ്യാം രാജിന്റെ ഫേയ്സ്ബുക്ക് കുറിപ്പ്,
‘ഞാനും നിന്നെപ്പോലൊരു പുൽച്ചാടി. ആക്ടർ മണിയോടൊപ്പം. ഫോട്ടോഗ്രാഫർ സിനിമയിൽ ലാലേട്ടനോടൊപ്പം ആടിപ്പാടി നടന്ന മണിയെന്ന വയനാടൻ ആദിവാസി ബാലനെ പ്രേക്ഷകർ മറക്കാനിടയില്ല. ആദ്യ സിനിമയിൽ തന്നെ മികച്ച ബാല താരത്തിനുള്ള അവാർഡും ലഭിച്ചു. കാലം കടന്നു. കബനീ നദിയിലൂടെ വെള്ളം ഒരുപാടൊഴുകി. മണി യുവാവായി, വിവാഹിതനായി, നാല് കുട്ടികളുടെ പിതാവുമായി. സിനിമയിൽ നിലനിൽക്കാൻ കഴിവ് മാത്രം പോരല്ലോ? സ്വയം പ്രൊമോട്ട് ചെയ്യാനറിയാത്ത, വ്ലോഗർമാരെക്കൊണ്ട് വീഡിയോ ചെയ്യിക്കാനറിയാത്ത, ലക്ഷങ്ങൾ കൊടുത്ത് ഓൺലൈൻ മീഡിയകളിൽ പബ്ലിസിറ്റി നൽകാൻ സാധിക്കാത്ത മണി പതിയെ സിനിമയിൽ നിന്നുമകന്നു. പ്രാരാബ്ധങ്ങൾ ആ നടനെ കൂലിപ്പണിക്കാരനാക്കി മാറ്റി. ഇടവേളകളിൽ അടയ്ക്ക പറിയ്ക്കാനും, കാപ്പിക്കുരു പറിയ്ക്കുവാനും പോയി.
‘ദീർഘകാലത്തെ ഇടവേളയ്ക്ക് ശേഷം ഉടലാഴം എന്ന സിനിമയിലും ചില വെബ് സീരീസുകളിലും വേഷം ലഭിച്ചു. ലഭിച്ച വേഷങ്ങൾ മനോഹരമാക്കിയെങ്കിലും മണി ഇനിയും ശ്രദ്ധിയ്ക്കപ്പെടേണ്ടതുണ്ട്. പ്രിവിലേജുകൾ വലിയൊരു പ്രശ്നമാണ്. പ്രിവിലേജുകളില്ലെങ്കിലും മണിയ്ക്ക് അസാമാന്യ കഴിവുണ്ട്. ഈയൊരു ചുറ്റുപാടിൽ നിന്നും മോഹൻലാൽ എന്ന മഹാനടനോടൊപ്പം അഭിനയിക്കുവാനും, സംസ്ഥാന അവാർഡ് നേടുവാനുമുള്ള പ്രാപ്തിയുണ്ടെങ്കിൽ മണിയിൽ പ്രതിഭയുണ്ട്, അതിനുമപ്പുറം അവനിൽ ഒരു പോരാളിയുണ്ട്. ആ പോരാളിയ്ക്ക് നിങ്ങളുടെ, നമ്മുടെ പിന്തുണയുടെ ആവശ്യമുണ്ട്. മലയാള സിനിമയിൽ മറ്റൊരു മണി കൂടി വരേണ്ടതുമുണ്ട്. ഈ പോസ്റ്റ് കാണുന്ന ഓരോരുത്തരും മണിയെ പിന്തുണയ്ക്കേണ്ടതുണ്ട്’.
