മുംബൈ: ഇന്ത്യൻ ക്രിക്കറ്റ് താരം ഋഷഭ് പന്ത് സുഖം പ്രാപിക്കുന്നു. വിജയകരമായി നടന്ന ശസ്ത്രക്രിയയ്ക്ക് ശേഷം ആദ്യമായി തന്റെ ചിത്രം സമൂഹമാദ്ധ്യമങ്ങളിൽ പങ്കുവെച്ചിരിക്കുകയാണ് താരം.’മുന്നോട്ട് ഒരു ചുവട്, ശക്തനാകാൻ ഒരു ചുവട്, മികച്ചതാകാൻ ഒരു ചുവട്’എന്നായിരുന്നു പന്ത് ചിത്രത്തിനൊപ്പം പങ്കുവെച്ച കുറിപ്പ്. ഇതോടെ താരത്തിന്റെ ആരാധകർ കൂടുതൽ ആവേശത്തിലായിരിക്കുകയാണ്.
ഡിസംബർ 30-നാണ് കാർ അപകടത്തിൽ ഋഷഭ് പന്തിന് പരിക്കേൽക്കുന്നത്. വാഹനം ഓടിക്കുന്നതിനിടെ പന്ത് ഉറങ്ങി പോകുകയായിരുന്നു. നിയന്ത്രണം വിട്ട കാർ ഡിവൈഡറിൽ ഇടിച്ച് കത്തി. തീ പടർന്ന കാറിൽ നിന്നും തലനാരിഴയ്ക്ക് പന്ത് രക്ഷപ്പെടുകയായിരുന്നു. അപകടത്തിന് ശേഷം താരം നിരവധി ശസ്ത്രക്രിയകൾക്ക് വിധേയനായിരുന്നു. അപകട സമയത്തുണ്ടായ പൊള്ളലുകളും മുറിവുകളും മെച്ചപ്പെട്ടുവരികയാണ്. പരിക്കിൽ നിന്ന് പൂർണമായും കരകയറാൻ താരത്തിന് 6-9 മാസം വരെ വേണ്ടിവരുമെന്ന് ഡോക്ടർമാർ പറയുന്നു. അതിനാൽ തന്നെ ഈ വർഷത്തെ ഐപിഎൽ അദ്ദേഹത്തിന് നഷ്ടമായേക്കും.
ക്രിക്കറ്റ് ഇതിഹാസം കപിൽ ദേവ് താരത്തെ വീട്ടിലെത്തി സന്ദർശിച്ചിരുന്നു. പരിക്കുകൾ ഭേദപ്പെട്ടാൽ ഉടൻ തന്നെ പരിശീലനം ആരംഭിക്കാൻ അദ്ദേഹം പന്തിന് നിർദ്ദേശം നൽകി. പന്തിന്റെ അഭാവം ഇന്ത്യൻ ടീമിനെ തളർത്തിയെന്നും അദ്ദേഹം പറഞ്ഞിരുന്നു.
Comments