മലയാളികളുടെ പ്രിയപ്പെട്ട സംവിധായകനാണ് ബേസിൽ ജോസഫ്. ഷോർട്ട് ഫിലിമുകളിലൂടെ മലയാള സിനിമയിലേക്കെത്തിയ ബേസിൽ, വളരെ ചെറിയ കാലയളവിനുള്ളിൽ തന്നെ തന്റെ പേര് ഒരു ബ്രാൻഡ് ആക്കി മാറ്റി. മലയാള സിനിമയെ ലോകത്തിന്റെ മുന്നിൽ അടയാളപ്പെടുത്തിയ അപൂർവ്വം ചില സംവിധായകരുടെ നിരയിൽ താരം ഇടം പിടിച്ചു. ബേസിലിന്റെ നിഷ്കളങ്കമായ ചിരി മലയാളികൾ ഹൃദയത്തോട് ചേർത്തതാണ്. ഇപ്പോഴിതാ, തന്റെ ജീവിതത്തിലെ ഏറ്റവും വലിയ സന്തോഷ വാർത്ത മലയാളികളുമായി പങ്കുവെച്ചിരിക്കുകയാണ് താരം.
തങ്ങളുടെ പ്രിയപ്പെട്ട സംവിധായകന് ഒരു പെൺകുട്ടി പിറന്നു എന്ന വാർത്തയാണ് മലയാളികൾക്ക് സന്തോഷമേകുന്നത്. ബേസിൽ തന്നെയാണ് ഇക്കാര്യം വെളിപ്പെടുത്തിയിരിക്കുന്നത്. ഭാര്യ എലിസബത്തിനും കുഞ്ഞിനുമൊപ്പമുള്ള ചിത്രവും താരം പങ്കുവെച്ചിട്ടുണ്ട്. ‘ഞങ്ങളുടെ മലാഖയുടെ വരവ് അറിയിക്കുന്നതിൽ സന്തോഷമുണ്ട്. ഹോപ്പ് എലിസബത്ത് ബേസിൽ! അവൾ ഇതിനകം ഞങ്ങളുടെ ഹൃദയം കവർന്നിരിക്കുന്നു. മകളോടുള്ള സ്നേഹത്താൽ ഞങ്ങളിപ്പോൾ ചന്ദ്രനും മുകളിലാണ്. അവൾ വളരുന്നതും അവളിൽ നിന്ന് പഠിക്കുന്നതും കാണാൻ ഞങ്ങൾക്ക് കാത്തിരിക്കാൻ കഴിയുന്നില്ല’ എന്നാണ് ബേസിൽ സമൂഹമാദ്ധ്യമങ്ങളിൽ കുറിച്ചിരിക്കുന്നത്.
വിനീത് ശ്രീനിവാസന്റെ സംവിധാന സഹായിയായിരുന്ന ബേസിൽ 2015-ൽ കുഞ്ഞിരാമയണം എന്ന സിനിമയിലൂടെയാണ് സ്വന്തന്ത്ര സംവിധായകനാകുന്നത്. പിന്നീട് ഗോദ, മലയാളത്തിലെ ആദ്യ സൂപ്പർ ഹീറോ ചിത്രം മിന്നൽ മുരളി എന്നീ ചിത്രങ്ങൾ ബേസിൽ സംവിധാനം ചെയ്തു. ഇതിന് പുറമെ 25 ഓളം ചിത്രങ്ങളിൽ ബേസിൽ അഭിനയിക്കുകയും ചെയ്തു. ബേസിലിന്റെയും എലിസബത്തിന്റെയും പ്രണയ വിവാഹമാണ്.
