റായ്പൂർ: സെലിബ്രിറ്റി ക്രിക്കറ്റ് ലീഗിന് ആരംഭം. സിസിഎൽ 2023-ന്റെ ആദ്യ മത്സരം ഇന്ന് ഉച്ചയ്ക്ക് 2:30ന് റായ്പൂരിൽ ആരംഭിച്ചു. ടോസ് നേടിയ കേരള സ്ട്രൈക്കേഴ്സ് ബൗളിംഗ് തിരഞ്ഞെടുത്തു. നടൻ ഉണ്ണി മുകുന്ദനാണ് ഇന്നത്തെ മത്സരം നയിക്കുക.തെലുങ്കു വാരിയേഴ്സാണ് കേരള സ്ട്രൈക്കേഴ്സിന്റെ എതിരാളികൾ. കഴിഞ്ഞ ഒന്നരമാസമായി കോച്ച് മനോജ് ചന്ദ്രന്റെ കീഴിൽ പരിശീലനം പൂർത്തിയാക്കിയ ശേഷമാണ് ആദ്യ മത്സരത്തിന് കേരള സ്ട്രൈക്കേഴ്സ് ഇറങ്ങുന്നത്. കുഞ്ചാക്കോ ബോബൻ ക്യാപ്റ്റനാവുന്ന ടീമിൽ 20 അംഗങ്ങളാണ് ഉള്ളത്.
കൊച്ചിയിലെയും ആലപ്പുഴയിലേയും വിവിധ ക്ലബ്ബുകളുമായി എട്ടോളം സൗഹൃദമാച്ചുകൾ കളിച്ച ശേഷമാണ് ടീം കളത്തിലിറങ്ങുന്നത്. നാല് ലീഗ് മാച്ചുകളാണ് കേരള സ്ട്രൈക്കേഴ്സിന് ആകെയുള്ളത്. ഈ മത്സരങ്ങളിലെ ജയപരാജയങ്ങളെ അടിസ്ഥാനമാക്കിയാണ് സെമിയിലേക്ക് യോഗ്യത നിശ്ചയിക്കുന്നത്. രണ്ട് മത്സരങ്ങളാണ് ഇന്നുള്ളത്. തെലുങ്കു വാരിയേഴ്സ്- കേരള സ്ട്രൈക്കേസിനെ നേരിടുമ്പോൾ, വൈകിട്ട് 7.30-യ്ക്ക് പഞ്ചാബ് ഡി ഷേർ – ഭോജ്പുരി ദബാംഗ്സിനെ നേരിടും.
കേരള സ്ട്രൈക്കേഴ്സ് ടീം: കുഞ്ചാക്കോ ബോബൻ, ആസിഫ് അലി, രാജീവ് പിള്ള, ഉണ്ണി മുകുന്ദൻ, അർജുൻ നന്ദകുമാർ, ഇന്ദ്രജിത്ത് സുകുമാരൻ, സിദ്ധാർത്ഥ് മേനോൻ, മണിക്കുട്ടൻ, വിജയ് യേശുദാസ്, ഷഫീഖ് റഹ്മാൻ, വിവേക് ഗോപൻ, സൈജു കുറുപ്പ്, വിനു മോഹൻ, നിഖിൽ കെ മേനോൻ, പ്രജോദ് കലാഭവൻ, ജീൻ പോൾ ലാൽ, സഞ്ജു ശിവറാം, സിജു വിൽസൺ, പ്രശാന്ത് അലക്സാണ്ടർ.
തെലുങ്ക് വാരിയേഴ്സ്: അഖിൽ അക്കിനേനി, സച്ചിൻ ജോഷി, അശ്വിൻ ബാബു, ധരം, ആദർശ്, നന്ദ കിഷോർ, നിഖിൽ, രഘു, സാമ്രാട്ട്, താരക രത്ന, തരുൺ, വിശ്വ, പ്രിൻസ്, സുശാന്ത്, ഖയ്യൂം, ഹരീഷ്
