ലക്നൗ : യുപി സർക്കാർ എല്ലാവരുടെയും പ്രശ്നങ്ങൾ പരിഹരിക്കുമെന്ന് ഉത്തർപ്രദേശ് മുഖ്യമന്ത്രി യോഗി ആദിത്യനാഥ്. ‘എല്ലാവരുടെയും പ്രശ്നങ്ങൾ പരിഹരിക്കുന്നതിനാണ് യുപി സർക്കാർ മുൻഗണന നൽകുന്നത്. ജനങ്ങളുടെ പ്രശ്നങ്ങൾ പരിഹരിക്കുന്നതും അവരുടെ പരാതികൾ നീക്കുന്നതുമാണ് യുപി സർക്കാരിന്റെ പ്രധാന ഉത്തരവാദിത്വം’ മുഖ്യമന്ത്രി പറഞ്ഞു. ഗോരഖ്നാഥ് ക്ഷേത്രത്തിൽ നടന്ന ജനതാ ദർശനത്തിനിടെ സംസാരിക്കുകയായിരുന്നു അദ്ദേഹം. സ്ത്രീകളും ന്യൂനപക്ഷ സമുദായങ്ങളിലുള്ളവരും ഉൾപ്പെടെ 300-ഓളം പേരാണ് ജനതാ ദർശനിൽ പങ്കെടുത്തത്.
‘സംസ്ഥാനത്തെ വിവിധ ഭാഗങ്ങളിലുള്ള ജനങ്ങളുടെ പരാതികൾ പരിശോധിക്കുകയും ആവശ്യമായ നടപടികൾ സ്വീകരിക്കുകയും ചെയ്യും,എല്ലാ പ്രശ്നങ്ങളും വേഗത്തിലും തൃപ്തികരമായും പരിഹരിക്കപ്പെടും. ഉത്തർപ്രദേശിലെ എല്ലാ പെൺകുട്ടികൾക്കും ഉന്നത വിദ്യാഭ്യാസം ലഭ്യമാകും. പണമില്ലാത്തതിനാൽ ഒരു രോഗിക്കും ചികിത്സ നിഷേധിക്കില്ല, ആരോടും അനീതി കാണിക്കാതെ ജനങ്ങളുടെ പരാതികൾ പരിശോധിച്ച് കാര്യക്ഷമതയോടെ പരിഹാര മാർഗങ്ങൾ കണ്ടെത്തണം’. പോലീസ്, റവന്യൂ ഉദ്യോഗസ്ഥർക്ക് മുഖ്യമന്ത്രി നിർദ്ദേശം നൽകി.
മുഖ്യമന്ത്രി യോഗി ജനങ്ങളുടെ പരാതികളും അപേക്ഷകളും നേരിട്ട് ശേഖരിക്കുകയും അവ ബന്ധപ്പെട്ട അതത് ഉദ്യോഗസ്ഥർക്ക് കൈമാറുകയും ചെയ്തു. ആശങ്കപ്പെടേണ്ടതില്ലെന്നും ജനങ്ങളുടെ ആവശ്യങ്ങൾ ഉടൻ നടപ്പാക്കുമെന്നും അദ്ദേഹം ഉറപ്പ് നൽകി. ഗുരുതര രോഗങ്ങൾ ബാധിച്ചവർ ചികിത്സാ സഹായത്തിനായി ജനതാ ദർശനിലെത്തുന്നുണ്ട്. അവരുടെ ചികിത്സാ ചിലവ് മുഴുവൻ സർക്കാർ ഏറ്റെടുക്കുമെന്നും അദ്ദേഹം ഉറപ്പ് നൽകി.
