1921-ലെ മലബാർ മാപ്പിള ലഹള പ്രമേയമാക്കി രാമസിംഹൻ അലി അക്ബർ സംവിധാനം ചെയ്യുന്ന ചിത്രമാണ് ‘പുഴ മുതൽ പുഴ വരെ’. പ്രഖ്യാപനം മുതൽ ഏറെ ചർച്ച ചെയ്യപ്പെട്ട സിനിമ മുടക്കാൻ ചില കോണുകളിൽ നിന്ന് ശക്തമായ ശ്രമങ്ങൾ നടന്നിരുന്നു. ചിത്രീകരണം ആരംഭിച്ചതു മുതൽ സെൻസർബോർഡ് സർട്ടിഫിക്കറ്റ് കിട്ടുന്നതുവരെ ഏറെ തടസ്സങ്ങളാണ് സംവിധായകന് നേരിടേണ്ടി വന്നത്. അവസാനം മാർച്ച് 3-ന് സിനിമ തിയറ്ററുകളിലെത്തുകയാണ്. ഇപ്പോഴിതാ, സിനിമയിലെ ഗാനങ്ങൾ പുറത്തിറക്കിയിരിക്കുകയാണ് അണിയറ പ്രവർത്തകർ.
സംവിധായകൻ രാമസിംഹന്റെ പിറന്നാൾ ആഘോഷത്തിന്റെ ഭാഗമായാണ് ‘ഇടനെഞ്ചിൽ കോർത്ത നോവിൽ’ എന്ന ഗാനം പുറത്തിറക്കിയിരിക്കുന്നത്. സ്വാമി ചിദാനന്ദപുരിയാണ് ‘1921 പുഴ മുതൽ പുഴ വരെ’യിലെ ആദ്യഗാനം പുറത്തിറക്കിയത്. ഹരി വേണുഗോപാൽ ഈണം പകർന്ന ഗാനം ആലപിച്ചിരിക്കുന്നത് സുനിൽ മത്തായി ആണ്. സംവിധായകൻ രാമസിംഹൻ തന്നെയാണ് വരികൾ എഴുതിയിരിക്കുന്നത്. ഇതിനുപുറമെ ‘പടച്ചവൻ പച്ചപ്പോൾ’ എന്ന ഗാനവും പുറത്തു വന്നിട്ടുണ്ട്. ഡോ. ജഗത് ലാൽ ആണ് ഈ ഗാനത്തിന് ഈണം പകർന്നിരിക്കുന്നത്. ഗോപകുമാർ മീനങ്ങാടിയാണ് ഗായകൻ.
മലബാറിൽ നടന്ന ഹിന്ദു വംശഹത്യയിൽ കൊല്ലപ്പെട്ട അറിയപ്പെടാത്ത നൂറുകണക്കിന് നിസ്സഹായരുടെ ജീവിതമാണ് ‘പുഴ മുതൽ പുഴ വരെ’ എന്ന ചിത്രം പ്രേക്ഷകരിലേയ്ക്ക് എത്തിക്കുന്നത്. മമധര്മ്മ പ്രൊഡക്ഷന്സിന്റെ ബാനറില് സിനിമയുടെ തിരക്കഥ, സംവിധാനം, ഗാനരചന, എഡിറ്റിംഗ് എന്നിവ എല്ലാം നിര്വ്വഹിച്ചിരിക്കുന്നത് രാമസിംഹൻ തന്നെയാണ്. തലൈവാസല് വിജയ്, ജോയ് മാത്യു, ആര്.എല്.വി. രാമകൃഷ്ണന് എന്നിവരാണ് ചിത്രത്തില് പ്രധാന വേഷങ്ങളിലെത്തുന്നത്. വാരിയന്കുന്നത്ത് കുഞ്ഞഹമ്മദ് ഹാജിയുടെ വേഷത്തിലാണ് തലൈവാസല് വിജയ് എത്തുന്നത്.
