നിരാകാരവും ഏകവുമായ പരബ്രഹ്മത്തിൽ നിന്ന് രൂപത്തോടു കൂടി ആദ്യം പരമേശ്വരനും പിന്നീട പരാശക്തിയും ആവിർ ഭവിച്ചു. എട്ടു ഭുജങ്ങളിലും ആയുധങ്ങളോട് കൂടി പ്രത്യക്ഷപ്പെട്ട പരാശക്തിയെ ശ്രീമദ് ശിവമഹാപുരാണത്തിൽ വ്യാസൻ വിശേഷിപ്പിച്ചിരിക്കുന്നത് ഇങ്ങനെയാണ്.
“നാനാഭരണ സംയുക്താ
നാനാശക്തി സമന്വിതാഃ
നാനായുധധരാ ദേവി
ഫുല്ല പങ്കജ ലോചനാ..”
നാനാഭരണങ്ങൾ ധരിച്ചു പ്രത്യക്ഷപ്പെട്ട ശക്തി സ്വരൂപിണിയുടെ വദനഭംഗി അവർണ്ണനീയമാണ്. മായ എന്നും പ്രകൃതി എന്നുമുള്ള അപരനാമങ്ങളാൽ അറിയപ്പെടുന്ന ജഗദംബിക പല അവതാരങ്ങളും സ്വീകരിച്ചു. ബ്രഹ്മാവ്, മഹാവിഷ്ണു, മഹേശ്വരൻ എന്നീ ത്രിമൂർത്തികളുടെ പത്നിമാരായി ഭവിച്ചത് പരാശക്തിയുടെ അവതാരങ്ങളാണ്. ആദ്യം സതീദേവിയായും പിന്നീട് പാർവതീദേവിയായും അവതരിച്ചത് പരാശക്തിയുടെ പൂർണ്ണ അവതാരങ്ങളാണ്. ലക്ഷ്മിദേവിയും സരസ്വതീ ദേവിയും പരാശക്തിയുടെ അംശാവതാരങ്ങളാണ്. ദുർജ്ജനങ്ങളെ നിഗ്രഹിക്കുന്നതിനും സജ്ജനങ്ങളെ അനുഗ്രഹിക്കുന്നതിനും വേണ്ടി പല അവതാരങ്ങളും ദേവി സ്വീകരിച്ചിട്ടുണ്ട്. അവയിൽ പ്രധാനപ്പെട്ട ഒന്നാണ് ഭദ്രകാളിയുടെ അവതാരം.
ദക്ഷയാഗത്തിൽ പത്നിയായ സതീദേവി ദേഹത്യജിച്ചതറിഞ്ഞപ്പോൾ ശിവഭഗവൻ കുപിതനായി ഭവിച്ചു. സ്വന്തം ജടപിടിച്ചു നിലത്തടിച്ചു. അപ്പോൾ അതിന്റെ ഒരു ഭാഗത്ത് നിന്ന് വീരഭദ്രനും മറു ഭാഗത്ത് നിന്ന് ഭദ്രകാളിയും അവതരിച്ചതായി ശ്രീമദ് ശിവമഹാപുരാണത്തിൽ പ്രകീർത്തിക്കുന്നു.
“മഹാകാളീ സമുത്പന്നാ
തജ്ജടാ പരഭാഗത..”
ജടയുടെ മറുഭാഗത്ത് നിന്ന് മഹാകാളി ഉദ്ഭവിച്ചു എന്നാണ് കവിവാക്യം. സതീദേവി തന്നെയാണ് ഭദ്രകാളിയായി അവതരിച്ചതെന്നാണ് വിശ്വാസം.കുംഭമാസത്തിലെ ഭരണി ഈ അവതാരരൂപിണിക്കു പ്രാധാന്യമുള്ള ദിവസമാണ് .ഭരണി നാളിൽ ദേവീക്ഷേത്രങ്ങളിൽ പ്രത്യേക പൂജകൾ നടത്തുന്നു. സർവൈശ്വര്യവും കൈവരുവാൻ ഭദ്രകാളിയെ പ്രീതിപ്പെടുത്തുന്നു.
ദക്ഷയജ്ഞം സംഹരിക്കുവാൻ വേണ്ടിയുണ്ടായ ഉഗ്രരൂപിണിയാണ് ഭദ്രകാളി. പല അസുരന്മാരെയും ഭദ്രകാളി സംഹരിച്ചിട്ടുണ്ട്. സ്തുതികൾ കൊണ്ടും നാമജപങ്ങൾ കൊണ്ടും ദീപാലങ്കാരങ്ങൾ കൊണ്ടും നൈവേദ്യങ്ങൾ കൊണ്ടും ക്ഷേത്രങ്ങളിലെ ദേവീ ചൈതന്യത്തെ പ്രീതിപ്പെടുത്തുന്നത് അത്യന്തം ശ്രേഷ്ഠമാണ്. ഭരണി ദിനത്തിൽ ദേവീപ്രീതികരങ്ങളായ പുസ്തകങ്ങൾ പാരായണം ചെയ്യുന്നത് വളരെ വിശിഷ്ടമാണ്.
കെ രാധാമണി തമ്പുരാട്ടി
ഫോൺ 8281179936
ആലപ്പുഴ സനാത ധർമ്മ വിദ്യാലയത്തിൽ അധ്യാപികയായിരുന്നു ലേഖിക .ഔദ്യോഗിക രംഗത്തു നിന്ന് വിരമിച്ച ശേഷം ശിവപുരാണവുമായി ബന്ധപ്പെട്ട രചനകൾ നിർവ്വഹിച്ചുകൊണ്ടിരിക്കുന്നു .
ശിവാവതാരങ്ങൾ, ശിവകഥാമൃതം, (ഡി സി ബുക്സ്), ശിവജ്ഞാനാമൃതം, ശിവസ്തോത്രമാല, ശിവമഹാസ്തോത്രവും ശിവസഹസ്രനാമവും (കേരളാ ബുക്ക് ട്രസ്റ്റ് കോഴിക്കോട്), ശിവപുരാണ സംഗ്രഹം (ഗുരുവായൂർ ദേവസ്വം), എന്നീ പുസ്തകങ്ങൾ പ്രസിദ്ധീകരിച്ചിട്ടുണ്ട്
Comments