മുംബൈ : അന്തരിച്ച നടി ശ്രീദേവിയുടെ അഞ്ചാം ചരമവാർഷികത്തിന് മുന്നോടിയായി ഭാര്യയെ അനുസമരിച്ച് ഇൻസ്്റ്റാഗ്രാമിൽ വികാരഭരിതമായ പോസ്റ്റ് പങ്കിട്ട് ബോണി കപൂർ. പോസ്റ്റിനൊപ്പം ശ്രീദേവിയുടെ മനോഹരമായ ഒരു ചിത്രവും ബോണി പങ്കുവെച്ചു.
അഞ്ച് വർഷം മുമ്പ് നീ ഞങ്ങളെ വിട്ടുപോയി, നിന്റെ സ്നേഹവും ഓർമ്മകളുമാണ് ഞങ്ങളെ മുന്നോട്ട് നയിക്കുന്നത്. അവയെല്ലാം എന്നേക്കുമായി ഞങ്ങളോടൊപ്പം നിലനിൽക്കും എന്നായിരുന്നു ബോണി കപൂർ കുറിച്ചത്. നിരവധി ആരാധകരും താരങ്ങളും പോസ്റ്റിനോട് പ്രതികരിച്ചിട്ടുണ്ട്.
കഴിഞ്ഞ ദിവസം മക്കളായ ജാൻവിയും ഖുഷി കപൂറും ശ്രീദേവിക്ക് ആദരാഞ്ജലികൾ അർപ്പിച്ചിരുന്നു. ‘ഞാൻ ഇപ്പോഴും അമ്മയെ എല്ലായിടത്തും തിരയുന്നു, ഞാൻ ചെയ്യുന്നതെല്ലാം അമ്മയ്ക്ക് അഭിമാനമാകുമെന്ന പ്രതീക്ഷയിലാണ് എല്ലാം ചെയ്യുന്നത്. ഞാൻ പോകുന്നിടത്തെല്ലാം ഞാൻ ചെയ്യുന്നതെല്ലാം ,അത് ആരംഭിക്കുന്നതും അവസാനിക്കുന്നതും അമ്മയിലാണ്’. എന്നാണ് മകളും നടിയുമായ ഖുഷി ഇൻസ്റ്റഗ്രാമിൽ പങ്കുവെച്ചത്.
2018 ഫെബ്രുവരി 24 ന് ദുബായിൽ വെച്ചാണ് ശ്രീദേവി അന്തരിച്ചത്. 1963-ൽ ജനിച്ച ശ്രീദേവി ചാന്ദ്നി, ലംഹേ ,മിസ്റ്റർ ഇന്ത്യ, ചാൽബാസ്, നാഗിന, സദ്മ, ഇംഗ്ലീഷ് വിംഗ്ലീഷ്, തുടങ്ങിയ ഹിന്ദി സിനിമകളിൽ പ്രധാന വേഷങ്ങളിലൂടെയാണ് അറിയപ്പെടുന്നത്. തമിഴ്, തെലുങ്ക്, മലയാളം, കന്നഡ സിനിമകളിലെ അസാധാരണമായ പ്രകടനത്തിലൂടെ ശ്രീദേവിയ്ക്ക് പത്മശ്രീ പുരസ്കാരവും ലഭിച്ചു . മരണാനന്തരം മികച്ച നടിക്കുള്ള ദേശീയ അവാർഡ് ലഭിച്ച മോം ആയിരുന്നു ശ്രീദേവിയുടെ അവസാന ചിത്രം.
