നടിയും അവതാരകയുമായ സുബി സുരേഷിന്റെ മരണ വാർത്തയോളം ഞെട്ടിച്ച മറ്റൊരു സംഭവം ഈ അടുത്ത കാലത്ത് മലയാളികൾ കേട്ടിരുന്ന് കാണില്ല. നിര്യാണ വിവരം പുറത്തുവന്നിട്ട് മണിക്കൂറുകൾ പിന്നിട്ടെങ്കിലും നടിയുടെ വേർപാട് വിശ്വസിക്കാൻ പോലും കഴിയുന്നില്ലെന്നതാണ് യാഥാർത്ഥ്യം.
ഒരുപാട് നേരത്തെ തന്നെ നമ്മെ വിട്ടുപിരിയേണ്ടി വന്ന അതുല്യ കലാകാരി.. കരൾ രോഗത്തെ തുടർന്നായിരുന്നു സുബിക്ക് മരണത്തിന് കീഴടങ്ങേണ്ടി വന്നത്. രണ്ടാഴ്ചയിലധികം നീണ്ട ആശുപത്രി വാസത്തിന് ശേഷമായിരുന്നു അവരുടെ അന്ത്യം. എന്താണ് കഴിഞ്ഞ ദിവസങ്ങളിൽ തനിക്ക് സംഭവിച്ചതെന്ന് സുബി സുരേഷ് വെളിപ്പെടുത്തുന്ന വീഡിയോയാണ് ഇപ്പോൾ പുറത്തുവന്നിരിക്കുന്നത്. മരിക്കുന്നതിന് മുമ്പായി സുബി തന്റെ പ്രേക്ഷകരോട് അവസാനമായി സംവദിച്ച കാര്യങ്ങൾ നൊമ്പരത്തോടെയല്ലാതെ കണ്ടുതീർക്കാനാകില്ല.
കേവലം പ്രേക്ഷകരോടുള്ള സുബിയുടെ അവസാന വാക്കുകൾ മാത്രമല്ല ഈ വീഡിയോ. നടിയുടെ അപ്രതീക്ഷിത വേർപാടിലേക്ക് നയിച്ചതെന്താണെന്ന് ഈ വീഡിയോയിലൂടെ പ്രേക്ഷകർക്ക് മനസിലാക്കാൻ സാധിക്കും. തന്റെ ചിട്ടയില്ലാത്ത ജീവിതമാണ് ഈ അവസ്ഥയിലെത്തിച്ചതെന്ന് സുബി സുരേഷ് വ്യക്തമാക്കുന്നു. നമുക്കിടയിൽ, നമുക്ക് ചുറ്റും, ഇതുപോലെ എത്രയെത്ര പേർ, സുബിയുടേതിന് സമാനമായ ജീവിതരീതിയിലൂടെ കടന്നുപോകുന്നുണ്ടാകാം. മടി കൊണ്ട് മാത്രമോ, കാര്യ ഗൗരവമില്ലാത്തത് കൊണ്ടോ, ഭക്ഷണരീതിയും ഉറക്കവുമൊന്നും ശ്രദ്ധിക്കാതെ എങ്ങനെയെങ്കിലുമൊക്കെ ജീവിക്കുന്ന എത്രയോ പേർ.. അത്ര നിസാരമായി തള്ളിക്കളയേണ്ടതല്ല ഇതൊന്നുമെന്ന് സുബി സുരേഷ് ആണയിട്ട് പറയുന്നു. ഇന്ന്, അവരുടെ വേർപാട് കൂടി സുബിയുടെ വാക്കുകളോടൊപ്പം ചേർത്ത് വായിക്കുമ്പോൾ നടി പ്രേക്ഷകരോട് പങ്കുവച്ച ജീവിതാനുഭവങ്ങൾ വലിയൊരു ഓർമ്മപ്പെടുത്തലാണ്.
”നേരത്തിനും സമയത്തിനും ഒന്നും ആഹാരം കഴിച്ചില്ല, പ്രോഗ്രാമിന്റെ തിരക്കുകളിൽ പലപ്പോഴും സമയം കിട്ടാറില്ല, അതിന് വേണ്ടി സമയം കണ്ടെത്താനും ശ്രമിക്കാറില്ല, പല ദിവസങ്ങളിലും ഒരുനേരമൊക്കെയാണ് കഴിച്ചിരുന്നത്. തൈറോയ്ഡിന് ഉൾപ്പെടെ പല മരുന്നുകളും ദിവസവും കഴിക്കാനുണ്ടായിരുന്നു. അതൊന്നും നേരാംവണ്ണം കഴിച്ചില്ല. ചിലപ്പോൾ മറക്കും, ചിലപ്പോൾ മടി.. അങ്ങനെയങ്ങനെ.. ജീവിതരീതിയും ഭക്ഷണരീതിയും മോശമായത് ശരീരത്തിൽ ഒട്ടനവധി പ്രശ്‌നങ്ങൾ സൃഷ്ടിക്കാൻ കാരണമായി.. ഒടുവിൽ ഈ ആശുപത്രി കിടക്ക വരെയെത്തി.. ” സുബി സുരേഷ് പറയുന്നു.
