ന്യൂഡൽഹി : കുവൈത്ത് ദേശീയ ദിനത്തിൽ ആശംസകളറിയിച്ച് വിദേശകാര്യ മന്ത്രി എസ് ജയശങ്കർ. കുവൈത്ത് വിദേശകാര്യമന്ത്രി ഷെയ്ഖ് സലേം അബ്ദുല്ല അൽ-ജാബർ അൽ-സബായ്ക്കും രാജ്യത്തെ ജനങ്ങൾക്കും ദേശീയ ദിനത്തോടനുബന്ധിച്ച് ട്വിറ്ററിലൂടെ ആശംസകൾ പങ്കുവയ്ക്കുകയായിരുന്നു അദ്ദേഹം. ഇരു രാജ്യങ്ങളും തമ്മിലുള്ള ചരിത്രപരമായ ബന്ധത്തിന് വളരെയധികം പ്രാധാന്യം നൽകുന്നുവെന്നും അദ്ദേഹം ഒദ്യോഗിക ട്വീറ്റിലൂടെ അറിയിച്ചു.
എല്ലാ വർഷവും ഫെബ്രുവരി 25-നാണ് കുവൈറ്റ് ദേശീയ ദിനമായി ആഘോഷിക്കുന്നത്. 1961 ജൂൺ 19-ന് ആദ്യ സ്വാതന്ത്ര്യ ദിനം ആഘോഷിച്ചത്. ആഘോഷവേളയിൽ ആളുകൾ പാർക്കുകളിലും, ബീച്ചുകളിലും റെസ്റ്റോറന്റുകളിലുമുൾപ്പടെ ഒത്തുകൂടുന്നു. ഈ ദിവസം കുവൈത്ത് നാഷണൽ മ്യൂസിയം, അൽ ബഹർ എന്റർടെയ്ൻമെന്റ് ഹിസ്റ്റോറിക്കൽ വില്ലേജ് തുടങ്ങി ചരിത്ര പ്രാധാന്യമുള്ള സ്ഥലങ്ങൾ ദീപങ്ങളാൽ അലങ്കരിക്കും.
ഡിസംബറിലാണ് ഷെയ്ഖ് സലേം അബ്ദുല്ല അൽ-ജാബർ അൽ-സബാ കുവൈത്തിന്റെ വിദേശകാര്യ മന്ത്രിയായി ചുമതലയേൽക്കുന്നത്. അദ്ദേഹത്തെ അഭിനന്ദിക്കുകയും കൂടുതൽ വികസനത്തിനായി ഒരുമിച്ച് പ്രവർത്തിക്കാൻ ആഗ്രഹിക്കുന്നുവെന്നും ജയശങ്കർ പറഞ്ഞു.
