ന്യൂഡൽഹി: ഇന്ത്യയിലെ ഐടി വിദഗ്ധരേയും പ്രൊഫഷണലുകളേയും ജർമ്മനിയിലേക്ക് ക്ഷണിച്ച് ചാൻസലർ ഒലാഫ് ഷോൾസ്. പ്രൊഫഷണലുകൾക്ക് വിസ ലഭിക്കാനും കുടുയേറ്റ വ്യവസ്ഥകൾ ലഘൂകരിക്കാനും ജർമ്മൻ സർക്കാർ നടപടികൾ സ്വീകരിക്കുകയാണെന്ന് ചാൻസലർ വ്യക്തമാക്കി. യൂറോപ്പിലെ ഏറ്റവും വലിയ സാമ്പത്തിക ശക്തിയായ ജർമ്മനിയിൽ പ്രൊഫഷണലുകളുടെ ക്ഷാമം നേരിടുന്ന സാഹചര്യത്തിൽ കൂടിയാണ് ഷോൾസിന്റെ പ്രസ്താവന.
നിങ്ങളിൽ നിരവധിപേർ ജർമ്മനിയിലെ അവസരങ്ങൾ പ്രയോജനപ്പെടുത്താൻ താത്പര്യപ്പെടുന്നതായി എനിക്ക് ഉറപ്പാണ്. ഞങ്ങൾക്ക് എല്ലാ മേഖലയിലേക്കും തൊഴിലാളികളെ ആവശ്യമായുണ്ട്. പ്രത്യേകിച്ച് സോഫ്റ്റ്വെയർ ഐടി മേഖലകളിലേക്ക്. ബെംഗളൂരുവിലെ സഎസ്എപി ലാബ്സ് ഐടി കമ്പനി സന്ദർശിച്ചുകൊണ്ട് അദ്ദേഹം പറഞ്ഞു.
പ്രതിഭയുള്ള തുടക്കക്കാർക്കും ജർമ്മനിയിലെ തൊഴിൽ അവസരങ്ങളിലേക്ക് അപേക്ഷിക്കാവുന്നതാണെന്നും ഷോൾസ് പറഞ്ഞു. കുടിയേറ്റ തടസ്സങ്ങൾ ലഘൂകരിക്കുന്നതിനുള്ള നിയമത്തിന്റെ അവസാന ഘട്ട നടപടികളാലാണ് ഇപ്പോൾ രാജ്യം. കുടുംബത്തിനൊപ്പം പ്രൊഫണലുകൾക്ക് ജർമ്മനിയിൽ എത്താനുള്ള നടപടി ക്രമങ്ങൾ സുഖമമാക്കുമെന്നും അദ്ദേഹം വ്യക്തമാക്കി.
ദ്വിദിന സന്ദർശനത്തിനായി ഇന്ത്യയിലെത്തിയ ജർമ്മൻ ചാൻസലർ ഒലാഫ് ഷോൾസ് പ്രധാനമന്ത്രി നരേന്ദ്രമോദിയുമായി കൂടിക്കാഴ്ച നടത്തി. പ്രതിരോധ, വ്യവസായ സഹകരണങ്ങൾ വർദ്ധിപ്പിക്കുന്നത് സംബന്ധിച്ച് ഇരുവരും ചർച്ച നടത്തി.
