ന്യൂഡൽഹി: മേഘാലയ തിരഞ്ഞെടുപ്പ് വിജയത്തിൽ മുഖ്യമന്ത്രിയും എൻപിപി അദ്ധ്യക്ഷനുമായ കൊണാർഡ് സാംഗ്മയ്ക്ക് അഭിനന്ദനം അറിയിച്ച് പ്രധാനമന്ത്രി നരേന്ദ്രമോദി. എൻപിപി എടുത്തുപറയാവുന്ന പ്രകടനമാണ് മേഘാലയയിൽ കാഴ്ചവെച്ചതെന്നും സംസ്ഥാനത്തിന്റെ പുരോഗതിക്കായുള്ള ഒരുമിച്ച് പ്രവർത്തിക്കാമെന്നും പ്രധാനമന്ത്രി ട്വീറ്റ് ചെയ്തു.
മേഘാലയ മുൻ മുഖ്യമന്ത്രിയും കൊണാർഡ് സാഗ്മയുടെ പിതാവുമായ പിഎ സാംഗ്മയെയും പ്രധാനമന്ത്രി അനുസ്മരിച്ചു. തന്റെ സുഹൃത്ത് ഈ നേട്ടത്തിൽ അഭിമാനം കൊള്ളുമെന്നും പ്രധാനമന്ത്രി ട്വീറ്റ് ചെയ്തു.
ബിജെപിയുമായി ചേർന്ന് ത്രിപുരയിൽ സർക്കാർ രൂപീകരിക്കുമെന്ന് കോൺറാഡ് സാംഗ്മ വ്യക്തമാക്കിയിരുന്നു. ബിജെപിയുടെ പിന്തുണയ്ക്ക് നന്ദി അറിയിക്കുന്നതായും സംസ്ഥാനത്തിന്റെ വികസനത്തിന് ഒരുമിച്ച് നിന്ന് പ്രവർത്തിക്കുമെന്നും സാംഗ്മ അറിയിച്ചു. ബിജെപി നൽകിയ പിന്തുണ കത്ത് പങ്കുവെച്ചുകൊണ്ടായിരുന്നു സാംഗ്മയുടെ ട്വീറ്റ്. എൻപിപിക്ക് പിന്തുണ അറിയിച്ച് മുഖ്യമന്ത്രിയും പാർട്ടി അദ്ധ്യക്ഷനുമായ കോൺറാഡ് സാംഗ്മയ്ക്ക് ബിജെപി കത്തുനൽകിയിരുന്നു. പിന്നാലെ കേന്ദ്ര ആഭ്യന്തരമന്ത്രി അമിത് ഷായുമായി സാംഗ്മയെ ഫോണിൽ ചർച്ച നടത്തി. തുടർന്നാണ് ബിജെപിയുമായി ചേർന്ന് സർക്കാർ രൂപീകരിക്കുമെന്ന് സാംഗ്മ അറിയിച്ചത്.
26 സീറ്റ് നേടിയ എൻപിപി ഏറ്റവും വലിയ ഒറ്റകക്ഷിയാണ്. 11 സീറ്റ് നേടിയ യുഡിപിയാണ് ഏറ്റവും വലിയ രണ്ടാമത്തെ കക്ഷി. ബിജെപിയ്ക്ക് രണ്ട് സീറ്റുകളും ലഭിച്ചു. ഒറ്റയ്ക്ക് മത്സരിച്ച ബിജെപി സംസ്ഥാനത്ത് മികച്ച പ്രകടനമാണ് കാഴ്ച്ചവെച്ചത്.
