പൊരിവെയിലത്ത് ചർമ്മം വാടാതിരിക്കാൻ സൺസ്ക്രീൻ ആവശ്യമാണെന്ന് എല്ലാവർക്കുമറിയാം.. ഒട്ടുമിക്ക സ്ത്രീകളും ഇതറിഞ്ഞുകൊണ്ട് സൺസ്ക്രീൻ പുരട്ടാറുമുണ്ട്. എന്നാൽ പിശുക്ക് കാട്ടി ലേശം ക്രീം എടുത്ത് പുരട്ടിയാൽ സൂര്യനിൽ നിന്ന് സംരക്ഷണം നൽകാൻ സൺസ്‌ക്രീനിന് കഴിയില്ല.
പുരട്ടേണ്ട രീതിയിൽ, പുരട്ടേണ്ട സമയത്ത്, പുരട്ടേണ്ട അളവിൽ ഉപയോഗിച്ചാൽ മാത്രമേ സൺസ്‌ക്രീനിന്റെ ഗുണം ലഭിക്കൂ.. അതെങ്ങനെയാണെന്ന് നോക്കാം..
സൺസ്ക്രീൻ പുരട്ടാൻ ഉപയോഗിക്കുന്ന ഒരു മാർഗമാണ് ‘ടൂ ഫിംഗർ ടിപ്’. ചൂണ്ടുവിരലിലും നടുവിരലിലും നീളത്തിൽ സൺസ്ക്രീൻ എടുക്കുക. ഇത് മുഖത്തും കഴുത്തിലും പുരട്ടാൻ വേണ്ട അത്രയുമുണ്ടാകും. ഇത്രയും സൺസ്ക്രീൻ എടുത്താൽ മാത്രമേ അതിന്റെ ഗുണം ലഭിക്കുകയുള്ളൂ.
കവിൾ, താടി, മൂക്ക്, നെറ്റി എന്നിവിടങ്ങളിൽ നിർബന്ധമായും ക്രീം പുരട്ടുക. ശേഷം രണ്ട് മിനിറ്റ് ഇവ ഉണങ്ങാൻ വേണ്ടി കാത്തിരിക്കുക. ഇതിന് ശേഷം ആവശ്യമെങ്കിൽ മേയ്‌ക്കപ്പ് ധരിക്കാം.
എസ്പിഎഫ് 30ന് മുകളിലുള്ള സൺസ്ക്രീൻ ആണ് ഉപയോഗിക്കേണ്ടത്. വീട്ടിൽ നിന്ന് പുറത്തേക്ക് പോകുന്നില്ലെങ്കിലും രാവിലെ തന്നെ സൺസ്ക്രീൻ പുരട്ടേണ്ടതാണ്. കൈകളിലും കാൽപാദങ്ങളിലും വെയിലേൽക്കുമെങ്കിൽ അവിടെയും സണസ്ക്രീൻ പുരട്ടണം. വേണ്ടവിധം ഉപയോഗിച്ചാൽ സൺസ്ക്രീൻ പെട്ടെന്ന് തീർന്നുപോകുമെന്നുള്ളതും ഓർക്കുക.
വിയർത്തുകഴിഞ്ഞാലും മുഖം കഴുകിയാലും സൺസ്‌ക്രീനിന്റെ ഇഫക്ട് പോകുന്നതാണ്. ഇത്തരം സാഹചര്യമുണ്ടായാൽ വീണ്ടും ക്രീം പുരട്ടേണ്ടതാണ്.
സൺസ്ക്രീൻ പുരട്ടിയാലും വെയിലേറ്റ് കരുവാളിക്കുന്നതിന് കാരണം ഒന്ന് മാത്രമാണ്. വേണ്ടവിധം സൺസ്ക്രീൻ പുരട്ടിയില്ലെങ്കിൽ ഇവ ഉപയോഗിക്കാത്തതിന് തുല്യമാണെന്ന് ഡെർമറ്റോളജിസ്റ്റുകൾ സൂചിപ്പിക്കുന്നു.
