ന്യൂഡൽഹി: ബോർഡർ ഗവാസ്കർ ടെസ്റ്റ് പരമ്പരയുടെ അവസാന മത്സരം കാണാൻ പ്രധാനമന്ത്രി നരേന്ദ്രമോദിയും ഓസ്ട്രേലിയൻ പ്രധാനമന്ത്രി ആന്റണി അൽബനീസും എത്തും. മാർച്ച് 9 ന് അഹമ്മദാബാദിലെ നരേന്ദ്ര മോദി സ്റ്റേഡിയത്തിലാണ് പരമ്പരയിലെ അവസാന മത്സരം.
നാല് ദിവസത്തെ സന്ദർശനത്തിനായി മാർച്ച് 8-ന് ഓസ്ട്രേലിയൻ പ്രധാനമന്ത്രി ഇന്ത്യയിലെത്തും. 2017ന് ശേഷം ഇതാദ്യമായാണ് ഒരു ഓസ്ട്രേലിയൻ പ്രധാനമന്ത്രി ഇന്ത്യ സന്ദർശിക്കുന്നത്. അഹമ്മദാബാദ്, മുംബൈ, ന്യൂഡൽഹി എന്നിവിടങ്ങളിൽ അൽബനീസ് സന്ദർശനം നടത്തും. ഓസ്ട്രേലിയൻ പ്രധാനമന്ത്രിയുടെ സന്ദർശനത്തിലൂടെ രാജ്യത്തിന്റെ തന്ത്രപരവും സാമ്പത്തികവുമായ ബന്ധം കൂടുതൽ മെച്ചപ്പെടുത്താനാകുമെന്ന് ഓസ്ട്രേലിയൻ പ്രധാനമന്ത്രിയുടെ ഓഫീസ് പുറത്തുവിട്ട പ്രസ്താവനയിൽ പറഞ്ഞു.
ന്യൂഡൽഹിയിൽ നടക്കുന്ന ഇന്ത്യ-ഓസ്ട്രേലിയ വാർഷിക ഉച്ചകോടിയിൽ ആന്റണി അൽബനീസ് പ്രധാനമന്ത്രി നരേന്ദ്ര മോദിക്കൊപ്പം പങ്കെടുക്കും. ഉച്ചകോടിയിൽ പങ്കെടുക്കാൻ മാർച്ച് 9ന് അദ്ദേഹം രാജ്യതലസ്ഥാനത്തെത്തും. ഈ വർഷം അവസാനം ഓസ്ട്രേലിയയിൽ നടക്കുന്ന ക്വാഡ് ലീഡേഴ്സ് ഉച്ചകോടിക്ക് മുന്നോടിയായാണ് ആന്റണി അൽബനീസിന്റെ ഇന്ത്യാ സന്ദർശനം.
നാല് മത്സരങ്ങളടങ്ങിയ ബോർഡർ-ഗവാസ്കർ ട്രോഫി പരമ്പരയിലെ നാലാമത്തെയും അവസാനത്തെയും മത്സരമാണ് മാർച്ച് 9ന്. നിലവിൽ നിലവിൽ ഒരു ജയത്തിന് ഇന്ത്യ പരമ്പരയിൽ മുന്നിലാണ്.
