ബേസിൽ ജോസഫും ദർശന രാജേന്ദ്രനും മത്സരിച്ച് അഭിനയിച്ച ജയ ജയ ജയ ജയ ഹേ ബോളിവുഡിലേക്കെന്ന് സൂചന. വിപിൻ ദാസ് സംവിധാനം ചെയ്ത ചിത്രത്തിന്റെ റീമേക്കുമായി ബന്ധപ്പെട്ട ചർച്ചകൾ മുംബൈയിൽ പുരോഗമിക്കുകയാണ്. ബോളിവുഡ് നടൻ അമീർഖാനാണ് സിനിമ പുനർനിർമ്മിക്കാൻ താത്പര്യം കാണിച്ചിരിക്കുന്നത്.
ജയ ജയ ജയ ജയ ഹേ കണ്ട് ഇഷ്ടപ്പെട്ട അമീർഖാൻ സിനിമയെ വാനോളം പുകഴ്ത്തിയെന്നാണ് റിപ്പോർട്ട്. വിപിൻദാസും നാഷിദ് മുഹമ്മദും ചേർന്നാണ് ചിത്രത്തിന്റെ തിരക്കഥ എഴുതിയത്.
ലക്ഷ്മി മേനോൻ, ഗണേഷ് മേനോൻ എന്നിവരായിരുന്നു ‘ജയ ജയ ജയ ജയ ഹേ’ നിർമിച്ചത്. ചിയേഴ്സ് എന്റർടെയ്ൻമെന്റിന്റിന്റെ ബാനറിലായിരുന്നു ‘ജയ ജയ ജയ ജയ ഹേ’യുടെ നിർമാണം.
അജു വർഗീസ്, അസീസ് നെടുമങ്ങാട്, സുധീർ പരവൂർ, മഞ്ജു പിള്ള, ശരത് സഭ, ഹരീഷ് പെങ്ങൻ എന്നിവരാണ് ‘ജയ ജയ ജയ ജയ ഹേ’യിലെ പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്.
