ന്യൂഡൽഹി : സെൻട്രൽ ഇൻഡസ്ട്രിയൽ സെക്യൂരിറ്റി ഫോഴ്സിന്റെ (സിഐഎസ്എഫ്) റൈസിംഗ് ദിനത്തിൽ ആശംസകൾ അറിയിച്ച് പ്രധാനമന്ത്രി നരേന്ദ്രമോദി. രാജ്യസുരക്ഷയുടെ കാര്യത്തിൽ സിഐഎസ്എഫിന് സുപ്രധാന പങ്കുണ്ടെന്ന് പ്രധാനമന്ത്രി പറഞ്ഞു. റൈസിംഗ് ദിനത്തിൽ കേന്ദ്ര വ്യാവസായിക സുരക്ഷാ സേനയെ അഭിനന്ദിക്കുന്നുവെന്നും അദ്ദേഹം അറിയിച്ചു. ട്വിറ്ററിലൂടെയാണ് പ്രധാനമന്ത്രി പ്രതികരണം.
‘ഇന്ത്യയിലെ കേന്ദ്ര സായുധ പോലീസ് സേനകളിലൊന്നായ സിഐഎസ്എഫ് 1969ൽ സ്ഥാപിതമായി. സുപ്രധാന സർക്കാർ, വ്യാവസായിക കെട്ടിടങ്ങളുടെ സുരക്ഷയ്ക്കായി ഈ സേനയെ ചുമതലപ്പെടുത്തിയിരിക്കുന്നു. റൈസിംഗ് ദിനത്തിൽ എല്ലാ സിഐഎസ്എഫ് ഉദ്യോഗസ്ഥർക്കും ആശംസകൾ. ഞങ്ങളുടെ സുരക്ഷാ സംവിധാനത്തിൽ സിഐഎസ്എഫിന് സുപ്രധാന പങ്കുണ്ട്. നിർണായകവും തന്ത്രപരവുമായ അടിസ്ഥാന സൗകര്യങ്ങൾ ഉൾപ്പെടെയുള്ള രാജ്യത്തിന്റെ പ്രധാനപ്പെട്ട സ്ഥലങ്ങളിൽ അവർ 24 മണിക്കൂറും സുരക്ഷ നൽകുന്നു’- പ്രധാനമന്ത്രി ട്വീറ്റ് ചെയ്തു.
അതേസമയം സിഐഎസ്എഫ് റൈസിംഗ് ദിനാഘോഷങ്ങൾ മാർച്ച് 12-ന് ഹൈദരാബാദിൽ വച്ച് നടക്കും. ഹൈദരാബാദിലെ നാഷണൽ ഇൻഡസ്ട്രിയൽ സെക്യൂരിറ്റി അക്കാദമിയിലാണ് (എൻഐഎസ്എ) ചടങ്ങ് നടക്കുക. ചടങ്ങിൽ മുഖ്യാതിഥിയായി അമിത് ഷാ പങ്കെടുക്കും. കഴിഞ്ഞ വർഷം നടന്ന 53-ാമത് റൈസിംഗ് ദിനാഘോഷവേളയിൽ അമിത് ഷാ പങ്കെടുത്തിരുന്നു.
എല്ലാ വർഷവും ഡൽഹി ഗാസിയാബാദിലെ സിഐഎസ്എഫ് ഗ്രൗണ്ടിലാണ് ചടങ്ങ് നടന്നിരുന്നത്. എന്നാൽ ആദ്യമായാണ് ഡൽഹിയ്ക്ക് പുറത്ത് പരിപാടി സംഘടിപ്പിക്കുന്നതെന്ന് സിഐസ്എഫ് ഉദ്യോഗസ്ഥർ പറഞ്ഞു. ആഘോഷങ്ങൾക്കായുള്ള ഒരുക്കങ്ങൾ തകൃതിയായി നടക്കുകയാണെന്നും, ക്ഷണിക്കപ്പെടേണ്ട അതിഥികളുടെ പട്ടിക രൂപപ്പെടുത്തിയെന്നും അധികൃതർ അറിയിച്ചു. കഴിഞ്ഞ 2 വർഷത്തോളമായി അർദ്ധസൈനിക സേനകളും ഡൽഹിയ്ക്ക് പുറത്താണ് റൈസിംഗ് ഡേ ആഘോഷിച്ചിരുന്നത്. കൂടാതെ ഛത്തീസ്ഗഢിലെ ബാസ്തർ ജില്ലയിൽ മാർച്ച് 19-ന് സിആർപിഎഫ് ഉദ്യോഗസ്ഥർ റൈസിംഗ് ഡേ ആഘോഷങ്ങൾ സംഘടിപ്പിക്കുമെന്ന് മുൻപെ അറിയിച്ചിരുന്നു.
