ന്യൂഡൽഹി: ഹോളി ആഘോഷത്തിനിടെ വിദേശവനിതയെ അപമാനിച്ച സംഭവത്തിൽ ഇടപെട്ട് ദേശീയ വനിതാ കമ്മീഷൻ. സംഭവത്തിൽ അതിവേഗം കേസെടുത്ത് നടപടിയെടുക്കാനാണ് ദേശീയ വനിതാ കമ്മീഷൻ അദ്ധ്യക്ഷ ഡൽഹി സിറ്റി പോലീസ് കമ്മീഷണർക്ക് നിർദേശം നൽകിയത്. ജപ്പാൻ സ്വദേശിനിയാണ് അതിക്രമത്തിന് ഇരയായത്.
ഹോളി ആഘോഷത്തിനിടെ ഒരു കൂട്ടം പുരുഷന്മാർ വനിതയെ ഉപഗ്രവിക്കുകയും അപമാനിക്കുകയും ചെയ്യുന്നതിന്റെ വീഡിയോ ദൃശ്യങ്ങളാണ് സമൂഹമാദ്ധ്യമങ്ങളിൽ പ്രചരിക്കുന്നത്. ഒരു സംഘം ആളുകൾ യുവതിയെ കടന്നുപിടിക്കുന്നതും ഹോളിയെന്ന് പറഞ്ഞുകൊണ്ട് നിറങ്ങൾ വാരിയെറിയുന്നതും ദൃശ്യങ്ങളിൽ വ്യക്തമാണ്. സംഘത്തിലൊരാൾ യുവതിയുടെ തലയിലേക്ക് മുട്ടയെറിയുന്നു. ആൾക്കൂട്ടത്തിൽ നിന്നും രക്ഷപ്പെടാനായി യുവതി ശ്രമിക്കുന്നതായും വീഡിയോ വ്യക്തമാണ്. രക്ഷപ്പെടാൻ ശ്രമിക്കുന്നതിനിടെ യുവതിയ്ക്ക് അടിയേൽക്കുന്നുമുണ്ട്. ദൃശ്യങ്ങൾ പ്രചരിച്ചതിന് പിന്നാലെയാണ് ഡൽഹി പോലീസ് സംഭവത്തെക്കുറിച്ച് അന്വേഷണം ആരംഭിച്ചത്.
ഹോളി ആഘോഷത്തിനിടെ വിദേശവനിതയ്ക്ക് അതിക്രമം ഏൽക്കുകയോ അപമാനിക്കപ്പെടുകയോ ചെയ്തിട്ടില്ലെന്നാണ് പോലീസിന്റെ നിലപാട്. എന്നാൽ വീഡിയോ പ്രചരിക്കുകയും പ്രതിഷേധം ശക്തമാവുകയും ചെയ്തതിന് പിന്നാലെയാണ് പോലീസ് കേസെടുക്കാൻ തയ്യറായത്.
