ന്യൂഡൽഹി: ഖാലിസ്ഥാൻ അനുകൂല വാദങ്ങൾ പ്രചരിപ്പിച്ച ആറ് യൂട്യൂബ് ചാനലുകൾക്കെതിരെ കേന്ദ്രസർക്കാർ നടപടി. വിദേശ രാജ്യങ്ങളിൽ നിന്ന് നിയന്ത്രിക്കുന്ന ഇത്തരം ആറ് യൂട്യൂബ് ചാനലുകളെ നിരോധിച്ചതായി കേന്ദ്ര വാർത്താ വിതരണ പ്രക്ഷേപണ മന്ത്രാലയ സെക്രട്ടറി അപൂർവ ചന്ദ്ര അറിയിച്ചു.
കഴിഞ്ഞ പത്ത് ദിവസങ്ങളിലായാണ് ആറ് ചാനലുകൾക്കെതിരെ നടപടി സ്വീകരിച്ചതെന്നും അവർ വ്യക്തമാക്കി. അതിർത്തി സംസ്ഥാനമായ പഞ്ചാബിൽ ക്രമസമാധാനം തകർക്കാൻ പോലും ഇടയായേക്കാവുന്ന വാദങ്ങളാണ് ചാനലുകളിൽ പ്രചരിപ്പിച്ചിരുന്നത്. പഞ്ചാബി ഭാഷയിലാണ് അവതരണമെന്നും അവർ അറിയിച്ചു.
സാമൂഹ്യവിരുദ്ധമായ ഉള്ളടക്കം പ്രചരിപ്പിക്കുന്ന ഇത്തരം ചാനലുകൾക്കെതിരെ ആർട്ടിഫിഷ്യൽ ഇന്റലിജൻസും അൽഗോരിതങ്ങളും ഉപയോഗിച്ച് സ്വയമേ നടപടിയെടുക്കാൻ യൂട്യൂബിനോടും സർക്കാർ ആവശ്യപ്പെട്ടിട്ടുണ്ട്. പ്രാദേശിക ഭാഷകളിൽ ഉള്ളടക്കമെത്തുന്നതിനാൽ ആർട്ടിഫിഷ്യൽ ഇന്റലിജൻസ് ഉപയോഗിച്ച് നടപടി സ്വീകരിക്കുക എന്നത് യൂട്യൂബിനെ സംബന്ധിച്ചിടത്തോളം വലിയ വെല്ലുവിളിയാണ്.
