”ചാമ്പ്യൻ സാനിയ..” ഹൃദയസ്പർശിയായ കത്തുമായി പ്രധാനമന്ത്രി നരേന്ദ്രമോദി; മറുപടിയുമായി സാനിയ മിർസ

ടെന്നിസിൽ നിന്നും വിരമിച്ച സാനിയ മിർസയ്‌ക്ക് ഹൃദയസ്പർശിയായ കത്തുമായി പ്രധാനമന്ത്രി നരേന്ദ്രമോദി. 36-കാരിയായ സാനിയ തന്നെയാണ് തന്റെ ട്വിറ്റർ പേജിലൂടെ പ്രധാനമന്ത്രിയുടെ കത്ത് പങ്കുവച്ചത്. അദ്ദേഹത്തിന്റെ പ്രചോദനാത്മകമായ വാക്കുകൾക്ക് നന്ദിയുണ്ടെന്ന് സാനിയ പറഞ്ഞു.

ഇന്ത്യയെ പ്രതിനിധീകരിക്കുന്നതിൽ എന്നും എപ്പോഴും അത്യധികം അഭിമാനം കൊണ്ടിട്ടുള്ളയാളാണ് താൻ. രാജ്യത്തിന്റെ യശസുയർത്താൻ ഇനിയും എന്തെല്ലാം ചെയ്യാൻ സാധിക്കുമോ അതെല്ലാം നൽകുമെന്നും പ്രധാനമന്ത്രിയുടെ പിന്തുണയ്‌ക്ക് നന്ദിയുണ്ടെന്നും സാനിയ ട്വിറ്ററിൽ കുറിച്ചു.

കഴിഞ്ഞ ജനുവരി ഏഴിനായിരുന്നു സാനിയ വിരമിക്കൽ പ്രഖ്യാപിച്ചത്. അവസാന ഗ്രാൻഡ്സ്ലാം മത്സരമായ ഓസ്‌ട്രേലിയൻ ഓപ്പണും ഒടുവിലെ മത്സരമായ ദുബായ് ടെന്നീസ് ചാമ്പ്യൻഷിപ്പും കളിച്ചതോടെ അവർ തന്റെ അത്യുജ്ജലമായ ടെന്നിസ് കരിയറിന് വിമാരമമിട്ടു. ഓസ്‌ട്രേലിയൻ ഓപ്പൺ മിക്‌സഡ് ഡബിൾസിൽ രോഹൻ ബൊപ്പണ്ണയ്‌ക്കൊപ്പം മത്സരിച്ച് ഫൈനലിലെത്തുകയും ചെയ്തിരുന്നു.

തുടർന്ന് കളിക്കളം വിട്ട സാനിയയ്‌ക്ക് സുദീർഘമായ കത്താണ് പ്രധാനമന്ത്രി എഴുതിയത്. അവർ രാജ്യത്തിന് നൽകിയ സംഭാവനകളും കടന്നുവന്ന ജീവിതയാത്രകളും നേരിട്ട പ്രതിസന്ധികളുമെല്ലാം അക്കമിട്ട് നിരത്തിയ കത്തായിരുന്നു അത്. ‘ചാമ്പ്യൻ സാനിയ’ എന്ന് അഭിസംബോധന ചെയ്തുകൊണ്ടായിരുന്നു കത്ത് ആരംഭിച്ചതെന്ന പ്രത്യേകതയുമുണ്ട്.

I would like to thank you Honorable Prime Minister @narendramodi Ji for such kind and inspiring words .I have always taken great pride in representing our country to the best of my ability and will continue to do whatever I can to make India proud . Thank you for your support. pic.twitter.com/8q2kZ2LZEN

— Sania Mirza (@MirzaSania) March 11, 2023

ഇന്ത്യയ്‌ക്ക് വേണ്ടി സാനിയ നൽകിയ നേട്ടങ്ങൾക്കെല്ലാം നന്ദി പറഞ്ഞ പ്രധാനമന്ത്രി, അവരുടെ ഭാവി ശോഭനമാകട്ടെയെന്ന് ആശംസിക്കുകയും ചെയ്തു. മകനോടൊപ്പം ചിലവഴിക്കാൻ കൂടുതൽ സമയം ഇനി സാനിയയ്‌ക്ക് ലഭിക്കുമെന്ന് പ്രതീക്ഷിക്കുകയാണെന്നും ടെന്നിസിനപ്പുറമുള്ള സ്വപ്‌നങ്ങൾ സ്വന്തമാക്കാൻ സാനിയയ്‌ക്ക് സാധിക്കട്ടെയെന്നും പ്രധാനമന്ത്രി ആശംസിച്ചു.