ന്യൂഡൽഹി : ട്രാൻസ്‌ജെൻഡർ കമ്മ്യൂണിറ്റിയ്‌ക്കായി രാജ്യത്തെ ആദ്യ ട്രാൻസ് ടീ സ്റ്റാൾ ആരംഭിച്ച റെയിൽ വേ മന്ത്രിയ്‌ക്ക് അഭിനന്ദനവുമായി മഹീന്ദ്ര ഗ്രൂപ്പ് ചെയർമാൻ ആനന്ദ് മഹീന്ദ്ര . സ്റ്റാളിനെ “പ്രധാനവും പുരോഗമനപരവും” എന്നാണ് ആനന്ദ് മഹീന്ദ്ര വിശേഷിപ്പിച്ചത്.
“ഈ ഒരു ചെറിയ സംരംഭം, എന്റെ വീക്ഷണത്തിൽ, നിങ്ങളുടെ മറ്റു പല പുരോഗമന പ്രോജക്റ്റുകളേയും പോലെ പ്രാധാന്യമുള്ളതും പരിവർത്തനപരവുമാണ്. ഇന്ത്യൻ റെയിൽവേ 8 ബില്യണിലധികം ആളുകളെ വഹിക്കുന്നു. ഏറ്റവും പ്രധാനമായി, ആരെയും ഒഴിവാക്കുന്നില്ല. ബ്രാവോ @അശ്വിനി വൈഷ്‌നവ്,” ആനന്ദ് മഹീന്ദ്ര, സ്റ്റാളിന്റെ ഫോട്ടോകൾ ഷെയർ ചെയ്ത്, മന്ത്രിയുടെ ഒറിജിനൽ പോസ്റ്റ് ടാഗ് ചെയ്തുകൊണ്ട് ട്വീറ്റ് ചെയ്തു .
അസമിലെ ഗുവാഹത്തി റെയിൽവേ സ്റ്റേഷനിലാണ് സ്റ്റാൾ പ്രവർത്തനം ആരംഭിച്ചത്. ട്രാൻസ്‌ജെൻഡർ കമ്മ്യൂണിറ്റിയെ ശാക്തീകരിക്കാനും അവരെ മുഖ്യധാരയിലേക്ക് കൊണ്ടുവരാനും ഇന്ത്യൻ റെയിൽവേ നടത്തുന്ന ശ്രമങ്ങളുടെ ഭാഗമാണിത്.
ഓൾ അസം ട്രാൻസ്‌ജെൻഡർ അസോസിയേഷന്റെ സഹകരണത്തോടെ നോർത്ത് ഈസ്റ്റ് ഫ്രോണ്ടിയർ റെയിൽവേ (എൻഇഎഫ്ആർ) ആണ് സ്റ്റാൾ ഒരുക്കിയത്. ഇത്തരം കൂടുതൽ സ്റ്റാളുകൾ തുറക്കാനും റെയിൽവേ പദ്ധതിയിടുന്നുണ്ട് .
