വേനൽക്കാലം കുറച്ച് കഠിനമായ കാലാവസ്ഥയാണ്. ഈ സമയത്ത് നമ്മൾ ധാരാളം വെള്ളം കുടിക്കണം, ഭക്ഷണത്തിൽ ജലാംശം അടങ്ങിയിട്ടുള്ള പഴങ്ങളും പച്ചക്കറികളും ഉൾപ്പെടുത്തണ്ടേത് അത്യാവശ്യമാണ്. വേനൽക്കാലത്ത് ഭക്ഷണത്തിൽ ഉൾപ്പെടുത്താൻ പറ്റിയ ഒരു പച്ചക്കറിയാണ് വെള്ളരിക്ക. വെള്ളരിക്കയിൽ 95 ശതമാനവും വെള്ളമാണ്. ശരീരത്തിൽ ജലാംശം നിലനിർത്താൻ ഇത് സഹായകരമാണ്. ഉയർന്ന പോഷകഗുണമുള്ളതും ജലാംശം ധാരാളമായി അടങ്ങിയതുമായ വെള്ളരിക്ക ജ്യൂസ് വേനൽക്കാലത്ത് ശരീര ആരോഗ്യത്തിന് അനുയോജ്യമായ പാനീയമാണ്.
വിശപ്പും ദാഹവുമെല്ലാം പെട്ടെന്ന് മാറാൻ വെള്ളരിക്ക ജ്യൂസ് കുടിക്കുന്നത് ആരോഗ്യത്തിന് ഏറെ നല്ലതാണ്. കുറഞ്ഞ കലോറിയും ഉയർന്ന ജലാംശവുമുള്ള വെള്ളരിക്ക ജ്യൂസ് ശരീരഭാരം കുറയ്ക്കാനും ദഹനത്തിനും രക്തത്തിലെ പഞ്ചസാരയുടെ അളവ് കുറയ്ക്കാനും കാൻസറിൽ നിന്ന് സംരക്ഷിക്കാനും സഹായിക്കുന്നതിലൂടെ ആരോഗ്യത്തിന് വളരെയധികം ഗുണം ചെയ്യും.
ഫൈബർ, വിറ്റാമിൻ കെ, വിറ്റാമിൻ സി, മഗ്നീഷ്യം, കാത്സ്യം, ഇരുമ്പ്, ഫോസ്ഫറസ്, സിങ്ക് തുടങ്ങി ധാരാളം പോഷകങ്ങൾ വെള്ളരിക്കയിൽ അടങ്ങിയിട്ടുണ്ട്. ശരീരഭാരം കുറയ്ക്കാൻ ആഗ്രഹിക്കുന്നവർക്ക് വെള്ളരിക്ക ഡയറ്റിൽ ധാരാളമായി ഉൾപ്പെടുത്താവുന്നതാണ്. വെള്ളരിക്കയിൽ അടങ്ങിയിട്ടുള്ള നാരുകൾ ഭക്ഷണം ദഹനനാളത്തിലൂടെ വേഗത്തിൽ കടന്നുപോകാൻ അനുവദിക്കുന്നു. ഉയർന്ന ഫൈബർ കൊളസ്ട്രോളിന്റെ അളവ് നിയന്ത്രിക്കാനും ഹൃദയ സംബന്ധമായ അസുഖങ്ങൾ തടയാനും സഹായിക്കും ദഹനസംബന്ധമായ പ്രശ്നങ്ങൾ, നെഞ്ചെരിച്ചിൽ, അസിഡിറ്റി, അൾസർ, മലബന്ധം എന്നിവ ഒഴിവാക്കാൻ വെള്ളരിക്ക അടങ്ങിയ ലഘുഭക്ഷണങ്ങൾ ധാരാളം കഴിക്കുന്നത് ഏറെ നല്ലതാണ്.
നിർജലീകരണവും വെള്ളത്തിന്റെ അളവ് കുറയുന്നതും ദഹനത്തിനും മലബന്ധത്തിനുമുള്ള പ്രശ്നങ്ങളുമായി ബന്ധപ്പെട്ടിരിക്കുന്നു. വെള്ളരിക്ക ജ്യൂസിൽ വെള്ളവും നാരുകളും കൂടുതലുള്ളതിനാൽ മലബന്ധം തടയാനും മലവിസർജനം മെച്ചപ്പെടുത്താനും കഴിയും. വണ്ണം കുറയ്ക്കാൻ ആഗ്രഹിക്കുന്നവർക്ക് ഡയറ്റിൽ ഉൾപ്പെടുത്താവുന്ന ഒന്നാണ് വെള്ളരിക്ക. കലോറി വളരെ കുറഞ്ഞ, ഫൈബർ ധാരാളം അടങ്ങിയ വെള്ളരിക്ക വിശപ്പിനെ നിയന്ത്രിക്കാൻ സഹായിക്കും. അതുവഴി ശരീരഭാരം കുറയ്ക്കാൻ കഴിയും.
വെളളരിക്ക ജ്യൂസ് എങ്ങനെ വീട്ടിൽ തയ്യാറാക്കാമെന്ന് നോക്കിയാലോ?
മീഡിയം വലിപ്പത്തിലുള്ള വെള്ളരിക്ക- 3 എണ്ണം എടുക്കുക. വെള്ളം- ഒരു കപ്പ്. നാരങ്ങ നീര്- 1 ടീസ്പൂൺ
ഇനി തയ്യാറാക്കുന്ന വിധം:
വെള്ളരിക്കയുടെ തൊലി കളഞ്ഞശേഷം ചെറിയ കഷ്ണങ്ങളാക്കി മുറിക്കുക.എന്നിട്ട് മിക്സി ജാറിലാക്കിയശേഷം 2 മിനിറ്റ് അരയ്ക്കുക. ജ്യൂസ് അരിച്ചെടുക്കുക. ഇതിലേക്ക് കുറച്ച് വെളളവും നാരങ്ങ നീരും ചേർക്കുക. ഫ്രിഡ്ജിൽ വെച്ച് ഏതാനും മണിക്കൂറുകൾ സൂക്ഷിച്ചശേഷം വെള്ളരിക്ക ജ്യൂസ് കുടിക്കുക.
Comments