ദിവസവും ഒരു ചായയോ കാപ്പിയോ കുടിക്കുന്നവരാണ് നമ്മളിൽ പലരും. കാപ്പി മാത്രം കുടിക്കുന്നവരും ഇതിനിടയിലുണ്ട്. നിങ്ങളൊരു കാപ്പി പ്രേമിയാണെങ്കിൽ ഇതറിഞ്ഞോളൂ.. കാപ്പി കുടിക്കുന്നത് അധികമായാൽ അത് ശരീരത്തിന് ഫലപ്രദമാകുമെന്നാണ് പഠനങ്ങൾ തെളിയിച്ചിരിക്കുന്നത്. അമിത വണ്ണവും പ്രമേഹ സാധ്യതയും കുറയ്ക്കാൻ ഇത് സഹായിക്കുമെന്നും ഗവേഷണത്തിൽ കണ്ടെത്തിയിട്ടുണ്ട്. എക്സെറ്റർ സർവകലാശാലയിലെ ആരോഗ്യ വിദഗ്ദരാണ് കാപ്പി കുടിക്കുന്നതിനെക്കുറിച്ച് പഠനം നടത്തിയത്. മെൻഡലിയൻ റാൻഡമൈസേഷൻ എന്ന സാങ്കേതിക വിദ്യ ഉപയോഗിച്ചാണ് വിദഗ്ദരുടെ പഠനം.
കാപ്പിയിൽ അടങ്ങിയിരിക്കുന്ന കഫീന്റെ അളവ് കൂടുതലായാൽ അമിതവണ്ണം, ടൈപ്പ് 2 പ്രമേഹം, മറ്റ് ഹൃദയസംബന്ധമായ രോഗങ്ങൾ എന്നിവയുടെ സാധ്യത കുറയ്ക്കാൻ സഹായിക്കും. ഉയർന്ന അളവിലുള്ള കഫീന്റെ സാന്നിധ്യം ശരീരത്തിലെ കൊഴുപ്പ് ക്രമാതീതമായി കുറയ്ക്കുന്നതിന് സഹായകരമാണ്. ശരീരം ആവശ്യത്തിന് ഇൻസുലിൻ ഉത്പാദിപ്പിക്കാതിരിക്കുകയോ അല്ലെങ്കിൽ അതിന്റെ ഉൽപാദനത്തെ ചെറുക്കുകയോ ചെയ്യുന്ന ഒരു ജീവിതശൈലി രോഗമാണ് ടൈപ്പ് 2 പ്രമേഹം.
രണ്ട് സാധാരണ ജീൻ വകഭേദങ്ങൾ കഫീൻ മെറ്റബോളിസവുമായി ബന്ധപ്പെട്ടിരിക്കുന്നുവെന്നാണ് വിദഗ്ദർ കണ്ടെത്തിയത്. ഇത് ശരീരത്തിലെ കൊഴുപ്പ് നിയന്ത്രിക്കുകയും ശരീരഭാരം കുറയ്ക്കുകയും ചെയ്യും. ശരീരഭാരം കുറയുന്നത് മൂലം ടൈപ്പ് 2 പ്രമേഹ സാധ്യത കുറയുമെന്ന് പഠനം വ്യക്തമാക്കുന്നു. ദിവസേന 100 മില്ലിഗ്രാം കാഫീൻ കഴിക്കുന്നത് പ്രതിദിനം 100 കലോറി വർദ്ധിപ്പിക്കുമെന്ന് കണക്കാക്കുന്നു.
കട്ടൻ കാപ്പി ആരോഗ്യത്തിന് ഏറ്റവും മികച്ചതാണെന്നും കാപ്പി കുടിക്കുന്നത് ശരീരത്തിലുണ്ടാകുന്ന അധിക ജലത്തെ ഇല്ലാതാക്കാൻ സഹായിക്കുമെന്നും ആരോഗ്യ വിദഗ്ധർ അവകാശപ്പെടുന്നു. കാപ്പി കുടിക്കുന്നത് ഹൃദയാരോഗ്യം വർദ്ധിപ്പിക്കുന്നതിന് സഹായിക്കും. കാപ്പിയിലടങ്ങിയിരിക്കുന്ന ആന്റി ഓക്സിഡന്റുകൾ ഹൃദ്രോഗം- പ്രമേഹം പോലെ പല അസുഖങ്ങളെയും ചെറുക്കാൻ സഹായകമാണ്. അതുപോലെ കാപ്പിയിലുള്ള ‘ക്ലോറോജെനിക് ആസിഡ്’ പല ആരോഗ്യപ്രശ്നങ്ങളെയും പ്രതിരോധിക്കുന്നതിനും ബിപി കുറയ്ക്കുന്നതിനും സാധിക്കുമെന്ന് പഠനം വ്യക്തമാക്കുന്നു.
Comments