വാഷിംഗ്ടൺ: ലോസ് ആഞ്ജലസ് മുൻ മേയർ എറിക്ക് ഗാർസെറ്റിയെ ഇന്ത്യയിലെ അംബാസിഡറായി നിയമിച്ചുകൊണ്ടുള്ള നിയമനത്തിന് യുഎസ് സെനറ്റിന്റെ അംഗീകാരം. പ്രസിഡന്റ് ജോ ബൈഡന്റെ വിശ്വസ്തനായ എറിക്കിനെ 2021ൽ ഇന്ത്യൻ അംബാസിഡറായി നോമിനേറ്റ് ചെയ്തെങ്കിലും സെനറ്റിന്റെ അംഗാകാരം ലഭിച്ചിരുന്നില്ല. ശേഷം കഴിഞ്ഞ ജനുവരിയിൽ വീണ്ടും നോമിനേറ്റ് ചെയ്യുകയായിരുന്നു.
ഇരു രാജ്യങ്ങളും തമ്മിലുള്ള ബന്ധം സുദൃഢമാക്കാനുളള ശ്രമത്തിന്റെ ഭാഗമായാണ് വിശ്വസ്തനെ തന്നെ ഇന്ത്യയിലെ അംബാസിഡറായി യുഎസ് പ്രസിഡന്റ് ജോ ബൈഡൻ തിരഞ്ഞെടുത്തത്. 2021 മുതൽ ഇന്ത്യയിലെ അംബാസിഡർ സ്ഥാനം ഒഴിഞ്ഞുകിടക്കുകയായിരുന്നു.
മുൻ യുഎസ് നേവി ഉദ്യോഗസ്ഥനായിരുന്ന എറിക്ക് ഗാർസെറ്റി സൈനിക സേവന ശേഷം ഡെമോക്രാറ്റിക് പാർട്ടിയിൽ ചേരുകയായിരുന്നു. 2001 ൽ ലോസ് ആഞ്ജലസ് സിറ്റി കൗൺസിലിലേക്ക് തിരഞ്ഞെടുക്കപ്പെട്ടു. 2013 ലാണ് എറിക്ക് ലോസ് ആഞ്ജലസിന്റെ മേയറായി തിരഞ്ഞെടുക്കപ്പെട്ടത്. 2022 ഡിസംബർ വരെ അദ്ദേഹം സ്ഥാനത്ത് തുടർന്നു.
