അഭിനയത്തിൽ മാത്രമല്ല സംവിധാനത്തിലും പ്രതിഭതെളിയിച്ച വ്യക്തിയാണ് തമിഴ് താരം പാർഥിപൻ. പർഥിപന്റെ സംവിധാന മികവിൽ പുറത്തിറങ്ങിയ ചിത്രങ്ങൾ ദേശീയ, സംസ്ഥാന പുരസ്‌കാരങ്ങൾ പലകുറി നേടിയിട്ടുമുണ്ട്. എന്നാൽ ഇപ്പോൾ തന്റെ മനസ്സിലെ ഒരു ആഗ്രഹം തുറന്നു പറഞ്ഞ് രംഗത്തെത്തിയിരിക്കുകയാണ് പാർഥിപൻ. മലയാളത്തിന്റെ മഹാനടൻ മോഹൻ ലാലിനെ നായകനാക്കി ഒരു സിനിമ സംവിധാനം ചെയ്യണം എന്നതാണ് തന്റെ ആഗ്രഹം എന്ന് വെളിപ്പെടുത്തിയിരിക്കുകയാണ് താരം.
പാർഥിപൻ തമിഴിൽ സംവിധാനം ചെയ്ത ഒത്ത സെരുപ്പ് സൈസ് 7 എന്ന ചിത്രം ഏറെ ശ്രദ്ധനേടിയ ചിത്രമായിരുന്നു. തിരക്കഥയും സംവിധാനവും നിർമ്മാണവും അഭിനയവുമൊക്കെ അദ്ദേഹം തന്നെ ആയിരുന്നു നിർവ്വഹിച്ചത്. ചിത്രത്തിൽ ഒരു കഥാപാത്രം മാത്രമായിരുന്നു ഉണ്ടായിരുന്നത്. ഈ ചിത്രം മലയാളത്തിലേക്ക് റിമേക്ക് ചെയ്യാനാണ് പാർഥിപൻ ആഗ്രഹിച്ചിരുന്നത്. ചിത്രത്തിൽ മോഹൻലാൽ നടനായി ആഭിനയിക്കണം എന്നതായിരുന്നു പാർഥിപന്റെ ആഗ്രഹം. അതിനുവേണ്ടി ശ്രമിക്കുകയും ചെയ്തിരുന്നതായി അദ്ദേഹം പറയുന്നു. പക്ഷേ നടന്നില്ല. ട്വീറ്റിലൂടെയാണ് പാർഥിപൻ ഇക്കാര്യം വെളിപ്പെടുത്തിയത്.
ഷാജി കൈലാസ് സംവിധാനം ചെയ്ത എലോൺ എന്ന ചിത്രത്തിന്റെ ഒടിടി റിലീസിനു പിന്നാലെ പാർഥിപന്റെ ഒത്ത സെരുപ്പുമായി താരതമ്യം ചെയ്തുകൊണ്ടുള്ള നിരവധി പോസ്റ്റുകൾ സോഷ്യൽ മീഡിയയിൽ പ്രചരിച്ചിരുന്നു. എലോണിലും മോഹൻലാൽ അവതരിപ്പിക്കുന്ന ഒരു കഥാപാത്രം മാത്രമാണുള്ളത്.
Leave a Comment