ഒച്ച് ഇഴയും പോലെ ഒരു യാത്ര; ഇങ്ങനെയൊരു റോഡ് നിങ്ങൾ കണ്ടിട്ടുണ്ടോ!; സമുദ്രനിരപ്പിൽ നിന്ന് 3200 മീറ്റർ ഉയരം; ലോകത്തിലെ ഏറ്റവും അപകടകരമായ റോഡ്

യാത്രകളെ ഇഷ്ടപ്പെടുന്നവരാണോ നിങ്ങൾ? എങ്കിൽ ചിലിയിലെ ഒരു റോഡിനെപ്പറ്റി നിങ്ങൾ അറിഞ്ഞിരിക്കണം. യാത്ര ചെയ്യുന്നവരെ മാത്രമല്ല എല്ലാവരെയും അത്ഭുതപ്പെടുത്തും ഈ റോഡ്. ചിലിയിലെ CH-60 ഹൈവേയുടെ ഭാഗമായ ലോസ് കാരക്കോൾസ് എന്ന റോഡ് കണ്ടാൽ ആരും ഒന്ന് കണ്ണുമിഴിച്ച് നോക്കി നിന്നു പോകും.

വളരെ കുത്തനെയുള്ള മലയിലൂടെ വളഞ്ഞ് പുളഞ്ഞു കിടക്കുന്ന ചിലിയിലെ ഈ റോഡിനെ സ്നെയിൽ(ഒച്ച്) റോഡുകൾ എന്നും വിളിക്കുന്നു. ലോകത്തിലെ തന്നെ ഏറ്റവും അപകടകരവും പ്രയാസകരവുമായ റോഡുകൾ കൂടിയാണിത്. വിസ്മയകരമായ ഈ പാതയുടെ വീഡിയോ സമൂഹമാദ്ധ്യമങ്ങളിൽ തരംഗമാവുകയാണ്. 40 ലധികം ബോർഡർ ക്രോസിംഗുകളുള്ള ഈ റോഡ് ഒരു വിസ്മയമാണ്.

ചിലിക്കാർ ലോസ് കാരക്കോൾസ് എന്ന് വിളിക്കുന്ന റോഡ്, ചിലിയിലെ സാന്റിയാഗോയെയും അർജന്റീനയിലെ ബ്യൂണസ് അയേഴ്സിനെയും ബന്ധിപ്പിച്ച് ആൻഡീസ് കോർഡില്ലേര പർവതനിരകളിലൂടെ കടന്നുപോകുന്നു. 800 മീറ്ററിൽ നിന്നും സമുദ്രനിരപ്പിൽ നിന്ന് 3200 മീറ്റർ ഉയരത്തിൽ വരെയാണ് ഈ റോഡ്. ഇതിനിടയിൽ 29-ലധികം ഹെയർപിൻ വളവുകളുമുണ്ട്. ഈ റോഡിലൂടെ യാത്ര ചെയ്താൽ തെക്കേ അമേരിക്കയിലെ ഏറ്റവും ഉയരമുള്ള കൊടുമുടിയായ അക്കോൺകാഗ്വയും കാണാം.