മുംബൈ: ലോകത്തിലെ ഏറ്റവും ഉയരം കുറഞ്ഞ ബോഡി ബിൽഡർ എന്ന ഗിന്നസ് റെക്കോർഡ് കരസ്ഥമാക്കിയ പ്രതീക് വിട്ടാൽ വിവാഹിതനായി. 2021-ലായിരുന്നു ലോകത്തെ ഏറ്റവും ഉയരം കുറഞ്ഞ പുരുഷ ബോഡി ബിൽഡർ എന്ന നേട്ടം അദ്ദേഹം സ്വന്തമാക്കിയത്. 3 അടി നാല് ഇഞ്ച് വലിപ്പമാണ് പ്രതീകിന്റെ ഉയരം.
ഒടുവിൽ പ്രതീകിന്റെ ആഗ്രഹ പ്രകാരമുള്ള ഒരു പങ്കാളിയെ തന്നെ അദ്ദേഹത്തിന് വധുവായി ലഭിക്കുകയും ചെയ്തു. നാല് അടിയും രണ്ട് ഇഞ്ചും ഉയരമുള്ള ജയയെയാണ് (22) പ്രതീക് വിവാഹം ചെയ്തത്.
കുടുംബാംഗങ്ങളുടെയും സുഹൃത്തുക്കളുടെയും സാന്നിധ്യത്തിൽ പരമ്പരാഗത രീതിയിലായിരുന്നു ഇരുവരുടെയും വിവാഹം നടന്നത്. മഹാരാഷ്ട്ര സ്വദേശിയായ പ്രതീക് നാല് വർഷം മുമ്പ് പരിചയപ്പെട്ട യുവതിയാണ് ജയ. പിന്നീട് ഇരുവരുടെയും വിവാഹ നിശ്ചയവും നടന്നിരുന്നു. 28-കാരനായ പ്രതീക് ഇൻസ്റ്റഗ്രാമിൽ ഇൻഫ്ളുവൻസർ കൂടിയാണ്. രണ്ട് ലക്ഷത്തിലധികം ഫോളോവേഴ്സും അദ്ദേഹത്തിനുണ്ട്. വിവാഹ ചിത്രങ്ങളും അദ്ദേഹം ആരാധകർക്കായി പങ്കുവച്ചിട്ടുണ്ട്.
