ന്യൂഡൽഹി: ദ്വിദിന സന്ദർശത്തിനായി ജപ്പാൻ പ്രധാനമന്ത്രി ഫ്യൂമിയോ കിഷിദോ തിങ്കളാഴ്ച്ച ഇന്ത്യയിൽ എത്തും. പ്രധാനമന്ത്രി നരേന്ദ്ര മോദിയുമായി അദ്ദേഹം കൂടിക്കാഴ്ച്ച നടത്തും. 41-ാം സപ്രു ഹൗസ് പ്രഭാഷണ പരമ്പരയിൽ പങ്കെടുക്കുന്ന അദ്ദേഹം ഡൽഹിയിലെ ബുദ്ധ ജയന്തി പാർക്കും സന്ദർശിക്കും.
ഇരു രാജ്യങ്ങളും തമ്മിലുള്ള ബന്ധം ശക്തമാക്കാൻ ലക്ഷ്യമിട്ടുകൊണ്ടാണ് കിഷിദോയുടെ ഇന്ത്യൻ സന്ദർശനം. ആരോഗ്യം, ഭക്ഷ്യസുരക്ഷ,ഊർജ സംരക്ഷണം തുടങ്ങിയ വിഷയങ്ങൾ ഇരു പ്രധാനമന്ത്രിമാരും തമ്മിലുള്ള കൂടിക്കാഴ്ചയിൽ ചർച്ച ചെയ്യും.
ജപ്പാൻ പ്രധാനമന്ത്രിയുടെ സന്ദർശനത്തിനായി ഇന്ത്യ കാത്തിരിക്കുകയാണെന്ന് വിദേശകാര്യ വക്താവ് അരിന്ദം ബാഗ്ചി പറഞ്ഞു. ജപ്പാൻ ഇന്ത്യയുടെ പ്രധാനപ്പെട്ട പങ്കാളിയാണെന്നും സൗഹൃദം ഊട്ടിയുറപ്പിക്കുന്ന ചർച്ചകൾക്കായി കാത്തിരിക്കുകയാണെന്നും അദ്ദേഹം പറഞ്ഞു.
ക്വാഡ് ഉച്ചകോടി ആരംഭിക്കാനിരിക്കെ ഇരു രാഷ്ട്രത്തലവന്മാരും തമ്മിലുള്ള കൂടിക്കാഴ്ച നിർണായകമാണ്. ഉച്ചകോടിയിൽ ഉന്നയിക്കേണ്ട വിഷയങ്ങളെക്കുറിച്ച് നേതാക്കളുടെ കൂടിക്കാഴ്ചയിൽ ചർച്ച ചെയ്യും.
