മാനസികാസ്വാസ്ഥ്യം അനുഭവപ്പെട്ടതിനെ തുടർന്ന് അമേരിക്കൻ നടിയായ അമാൻഡ ബൈൻസിനെ ആശുപത്രിയിൽ പ്രവേശിപ്പിച്ചു. തെരുവിലൂടെ നഗ്നയായി നടന്നതിനെ തുടർന്നാണ് നടിയെ സൈക്യാട്രിക് കെയറിൽ എത്തിച്ചത്.
വാട്ട് എ ഗേൾ വാണ്ട്സ്, ഷീ ഈസ് ദി മാൻ, ഹെയർസ്പ്രേ, സിഡ്നി വൈറ്റ്, ഈസി എ എന്നീ ഹിറ്റ് ചിത്രങ്ങളിലൂടെ പ്രേക്ഷകർക്ക് മുമ്പിലെത്തിയ നടിയാണ് അമാൻഡ ബൈൻസ്. ഒരു കൊല്ലം മുമ്പാണ് നടിയുടെ കൺസർവേറ്റർഷിപ്പ് അവസാനിച്ചത്. കഴിഞ്ഞ ദിവസം തെരുവിൽ നഗ്നയായി ഇറങ്ങി വന്ന നടി കാറിന് മുന്നിലേക്ക് ചാടുകയും താൻ ചില പ്രയാസങ്ങളിലൂടെയാണ് കടന്നുപോകുന്നതെന്ന് ഡ്രൈവറോട് പറയുകയും ചെയ്തു. തൊട്ടുപിന്നാലെ 911 എന്ന എമർജൻസി നമ്പറിലേക്ക് സ്വയം വിളിച്ച് സഹായം തേടിയ നടിയെ പോലീസുകാരെത്തി കൂട്ടിക്കൊണ്ട് പോവുകയായിരുന്നു. നിലവിൽ സൈക്യാട്രിക് ഹെൽത്ത് കെയർ യൂണിറ്റിലാണ് നടിയുള്ളത്.
72 മണിക്കൂർ നിരീക്ഷിച്ചതിന് ശേഷം കൂടുതൽ ചികിത്സ ആവശ്യമാണെങ്കിൽ നടി ആശുപത്രിയിൽ തുടരുമെന്നാണ് വിവരം. 36-കാരിയായ അമാൻഡ നേരത്തെ ബൈപ്പോളാർ ഡിസോർഡറിന് ചികിത്സ തേടിയിരുന്നതായി റിപ്പോർട്ടുകളുണ്ട്.
Comments