നീണ്ട ആശുപത്രിവാസത്തിന് ശേഷം സാധാരണ ജീവിതത്തിലേക്ക് തിരിച്ചെത്തിയിരിക്കുകയാണ് നടനും അവതാരകനുമായ മിഥുൻ രമേശ്. അസുഖത്തിന്റെ ചെറിയ ലക്ഷണങ്ങൾ കണ്ടപ്പോൾ താൻ ആദ്യം കാര്യമാക്കിയെടുത്തില്ലെന്നാണ് മിഥുൻ പറയുന്നത്. മുഖം ഒരുവശത്തേക്ക് കോടുന്ന രോഗമായ ബെൽസ് പാഴ്സി രോഗത്തിന് ചികിത്സയിലായിരുന്നു താരം.
അങ്ങനെ ആരും ചെയ്യരുതെന്നും അസുഖം വന്നാൽ 24 മണിക്കൂറിനുള്ളിൽ മരുന്ന് കഴിച്ചിരിക്കണം. അല്ലാത്തപക്ഷം കുറച്ച് പേർക്കെങ്കിലും പഴയ അവസ്ഥയിലേക്ക് മുഖം കൊണ്ടുവരാൻ പറ്റാതെയാകും. ഒരു രണ്ട്, മൂന്ന് ശതമാനം കൂടി ശരിയാകാനുണ്ട് എനിക്ക്. ആ അസുഖത്തെ കുറിച്ച് ചിന്തിക്കരുതെന്നാണ് ഡോക്ടർമാർ പറഞ്ഞിരിക്കുന്നത്. അസുഖം പിടിപെട്ടയുടൻ ചികിത്സിച്ചാൽ നൂറ് ശതമാനവും ബെൽസ് പാൾസി മാറും. കോമഡി ഉത്സവത്തിന്റെ ഷൂട്ടിങ് നടക്കുന്ന സമയത്ത് കണ്ണിന് ചെറിയ പ്രശ്നങ്ങൾ എനിക്ക് തോന്നുന്നുണ്ടായിരുന്നു. കണ്ണ് അടയാൻ ബുദ്ധിമുട്ടുണ്ടായിരുന്നു. അന്ന് കണ്ണടയ്ക്കാൻ പറ്റുന്നില്ലായിരുന്നു. മാത്രമല്ല നാല്, അഞ്ച് ദിവസമായി ഉറക്കവും ഉണ്ടായിരുന്നില്ല. യാത്രകൾ മുഴുവൻ കാറിലായിരുന്നു. അതുകൊണ്ട് കൂടിയായിരിക്കും ഈ അസുഖം വന്നതെന്നാണ് ഡോക്ടർമാർ പറയുന്നത്- മിഥുൻ വിശദീകരിച്ചു.
മാർച്ച് മൂന്നാം തിയതിയാണ് ബെൽസ് പാഴ്സി രോഗത്തിന് ചികിത്സ തേടിയതായി മിഥുൻ രമേശ് അറിയിച്ചത്. താരം തന്നെ സമൂഹമാദ്ധ്യമങ്ങളിലൂടെയാണ് വിവരം പങ്കുവെച്ചത്. തിരുവനന്തപുരം അനന്തപുരി ആശുപത്രിയിലായിരുന്നു ചികിത്സ.
