എറണാകുളം : തൃക്കാക്കരയിൽ ലഹരി വിൽപ്പന നടത്തിയതിന് പിടിയിലായ നാടക നടി താനല്ലെന്ന് അഞ്ജു കൃഷ്ണ അശോക് നേരത്തെ പോസ്റ്റിട്ടിരുന്നു. പേരിൽ മാത്രമാണ് സാമ്യതയുള്ളതെന്നും കാര്യമറിയാതെ സമൂഹമാദ്ധ്യമങ്ങളിൽ പലരും തന്നെ ടാഗ് ചെയ്യുന്നുണ്ടെന്നും താരം പറഞ്ഞിരുന്നു.
എന്നാൽ ഇതിൽ മാറ്റമൊന്നും സംഭവിക്കാത്തതിനാൽ നടി വീണ്ടും പ്രതികരണവുമായി രംഗത്തെത്തിയിരിക്കുകയാണ്. കുറ്റക്കാരെ ടാഗ് ചെയ്യുന്നതിന് പകരം തന്നെയാണ് മാദ്ധ്യമങ്ങളടക്കം ടാഗ് ചെയ്യുന്നതെന്ന് താരം പറഞ്ഞു. ഇത് തനിക്കും കുടുംബത്തിനും നിസ്സാര കാര്യമല്ലെന്നും ഇത്തരം ടാഗുകൾ നീക്കം ചെയ്ത് ആശയക്കുഴപ്പം ഒഴിവാക്കണമെന്നും അഞ്ജു ആവശ്യപ്പെട്ടു. ഇനിയും ഇത്തരത്തിൽ ആവർത്തിക്കപ്പെടുകയാണെങ്കിൽ നിയമനടപടിയുമായി മുന്നോട്ട് നീങ്ങുമെന്നും താരം താക്കീത് നൽകിയിട്ടുണ്ട്.
കഴിഞ്ഞ ദിവസമാണ് എം.ഡി.എം.എയുമായി അഞ്ജു കൃഷ്ണ എന്ന നാടക നടി പിടിയിലാവുന്നത്. സിറ്റി പോലീസ് കമ്മീഷണറുടെ നേതൃത്വത്തിലുള്ള യോദ്ധാവ് സ്ക്വാഡിന്റെ പരിശോധനയിലാണ് യുവതി പിടിയിലാവുന്നത്.
ജിബു ജേക്കബിന്റെ സംവിധാനത്തിൽ അരങ്ങേറിയ ആദ്യരാത്രി എന്ന ചിത്രത്തിലൂടെയാണ് അഞ്ജു കൃഷ്ണ അഷോക് വെള്ളിത്തിരയിലെത്തുന്നത്. തുടർന്ന് പ്രതി പൂവൻകോഴി, കുഞ്ഞെൽദോ, രമേശ് ആൻ്ഡ് സുമേഷ് എന്നീ ചിത്രങ്ങളിൽ അഭിനയമികവ് കാഴ്ചവെച്ചിട്ടുണ്ട്. കായ്പ്പോളയാണ് താരത്തിന്റേതായി പുറത്തിറങ്ങാനുള്ള ചിത്രം.
Comments