നെൽസൺ ദിലീപ്കുമാറിന്റെ സംവിധാനത്തിൽ അരങ്ങേറുന്ന ആക്ഷൻ കോമഡി ചിത്രമായ ജയിലറിന്റെ ഷൂട്ടിങ്ങിനായി കേരളത്തിലെത്തിയതായിരുന്നു രജനീകാന്ത്. സിനിമയുടെ അതിരപ്പിളി ഷെഡ്യൂൾ പൂർത്തീകരിച്ചിരിക്കുകയാണ് താരം. ഇന്നലെ കൊച്ചിയിൽ വിമാനത്താവളത്തിലാണ് താരമെത്തിയത്. ഒരു ദിവസത്തെ ഷൂട്ട് മാത്രമായിരുന്നു താരത്തിന് അതിരപ്പിള്ളിയിലുണ്ടായിരുന്നത്. അതിരപ്പിള്ളി ഒരു മനോഹര സ്ഥലമാണെന്ന് പ്രശംസിച്ചതിന് ശേഷമാണ് താരം ഇവിടെ നിന്നും മടങ്ങിയത്.
ചിത്രത്തിന്റെ പേര് സൂചിപ്പിക്കുന്നത് പോലെ തന്നെ ഒരു ജയിലറുടെ വേഷത്തിലാണ് താരം പ്രേക്ഷകർക്ക് മുന്നിൽ എത്തുക. മുത്തുവേൽ പാണ്ഡ്യൻ എന്ന കഥാപാത്രത്തെയാണ് താരം സിനിമയിൽ അവതരിപ്പിക്കുന്നത്. രമ്യ കൃഷ്ണൻ, വിനായകൻ എന്നിവരാണ് ചിത്രത്തിൽ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്.
മോഹൻലാലും രജനികാന്തും ഒന്നിക്കുന്ന ചിത്രമെന്ന പ്രത്യേകതയും ജയ്ലറിനുണ്ട്. ജയിലറിന്റെ ഷൂട്ടിംഗ് രാജസ്ഥാനിൽ നടക്കുന്ന വേളയിൽ ഇരുവരും പരസ്പരം കണ്ടിരുന്നു. ലിജോ ജോസ് പെല്ലിശ്ശേരിയുടെ സംവിധാനത്തിൽ ഒരുങ്ങുന്ന ചിത്രമായ മലൈക്കോട്ടൈ വാലിബന്റെ ചിത്രീകരണവുമായി ബന്ധപ്പെട്ട് രാജസ്ഥാനിൽ എത്തിയതായിരുന്നു മോഹൻലാൽ.
