മുംബൈ: ഇന്ത്യാ- ഓസ്ട്രേലിയ ഏകദിനത്തിൽ മോശം പ്രകടനം കാഴ്ചവെച്ച സൂര്യകുമാർ യാദവിന് പിന്തുണ അറിയിച്ച് യുവരാജ് സിംഗ്. കരിയറിൽ ഉയർച്ച താഴ്ചകൾ സ്വാഭാവികമാണെന്നും സൂര്യകുമാറിന് ഇനിയും അവസരങ്ങൾ നൽകുകയാണെങ്കിൽ അദ്ദേഹം ഫോമിലേക്ക് തിരിച്ചെത്തുമെന്നും യുവ്രാജ് പറഞ്ഞു. ഐസിസി ലോക ടി 20 റാങ്കിംഗിൽ ഒന്നാമതുള്ള ബാറ്ററാണ് സൂര്യകുമാർ യാദവ്.
ലോകകപ്പ് മുന്നിൽ നിൽക്കെ ഇന്ത്യൻ ബാറ്റിംഗ് നിരയിൽ നാലാം നമ്പറിലേക്ക് ആര് വരുമെന്ന് ഇപ്പോഴും വ്യക്തത വന്നിട്ടില്ല. നാലാം സ്ഥാനത്തേക്ക് സഞ്ജു സാംസണ് അവസരം നൽകാനുള്ള സാധ്യതകൾ തെളിഞ്ഞു വരുന്ന സാഹചര്യത്തിലാണ് സൂര്യകുമാറിന് ഇനിയും അവസരങ്ങൾ നൽകണമെന്ന് യുവ്രാജ് സിംഗ് ആവശ്യപ്പെടുന്നത്.
ഓരോ കായികതാരവും അവരുടെ കരിയറിൽ ഉയർച്ച താഴ്ചകളിലൂടെയാണ് കടന്ന് പോകുന്നത്. നാമെല്ലാവരും എപ്പോഴെങ്കിലും അത് അനുഭവിച്ചിട്ടുണ്ട്. സൂര്യകുമാർ യാദവ് ഇന്ത്യയുടെ ഒരു പ്രധാന കളിക്കാരനാണെന്ന് ഞാൻ വിശ്വാസിക്കുന്നു. അവസരങ്ങൾ ലഭിക്കുകയാണെങ്കിൽ ലോകകപ്പിൽ ഒരു പ്രധാന പങ്ക് സൂര്യകുമാറിന് വഹിക്കാനാകും. നമ്മുടെ താരങ്ങളെ നമുക്ക് പിന്തുണക്കാം ‘സൂര്യൻ വീണ്ടും ജ്വലിക്കും’. എന്നായിരുന്നു യുവരാജിന്റെ വാക്കുകൾ. ട്വിറ്ററിലൂടെയാണ് താരം ഇക്കാര്യം പങ്കുവെച്ചത്.
വളരെ കാലം ഇന്ത്യയുടെ ബാറ്റിംഗ് നിരയിൽ നാലാം സ്ഥാനത്ത് തിളങ്ങിയിരുന്ന താരമായിരുന്നു യുവരാജ്. യുവി ക്രിക്കറ്റിൽ നിന്ന് വിരമിച്ചതിന് ശേഷം ഇന്ത്യയുടെ ടൂ ഡൗണിൽ അനുയോജ്യനായ മറ്റൊരു വ്യക്തി എത്തിയിട്ടില്ല. ഇന്ത്യാ- ഓസ്ട്രേലിയ ഏകദിനത്തിൽ മൂന്ന് മത്സരങ്ങളിലും ഗോൾഡൻ ഡക്കായാണ് സൂര്യ കുമാർ പൗലിയനിലേക്ക് മടങ്ങിയത്. മൂന്ന് മത്സരങ്ങളടങ്ങിയ പരമ്പരയുടെ എല്ലാ മത്സരത്തിലും ഒരാൾ ആദ്യമായിട്ടായിരുന്നു പൂജ്യത്തിന് പുറത്താകുന്നത്. ഈ അവസരത്തിൽ സൂര്യയുടെ ശൈലി ടി20ക്ക് യോജിച്ചതാണെന്നും ഏകദിനത്തിന് പറ്റിയതല്ലെന്നുമുള്ള വിമർശനങ്ങൾ ഉയരുന്നുണ്ട്.
