മലയാള സിനിമ പ്രേമികളുടെ പ്രിയപ്പെട്ട നായകന്മരിലൊരാളാണ് ജയറാം. 90 കാലഘട്ടത്തിൽ സിനിമയിൽ നിത്യ സാന്നിധ്യമായിരുന്നു ജയറാം. തന്റെ അഭിനയ ജീവിതത്തിൽ ചെറുതും വലുതുമായ ഒട്ടനവധി കഥാപാത്രങ്ങളാണ് പ്രേക്ഷകർക്ക് സമ്മാനിച്ചത്. അഭിനേതാവിന് പുറമെ ചെണ്ടക്കാരൻ, കൃഷിക്കാരൻ, ആനപ്രേമി, മിമിക്രി ആർട്ടിസ്റ്റ് എന്നീ നിലകളിൽ അറിയപ്പെടുന്ന ജയറാം നല്ലൊരു കർഷകൻ കൂടിയാണ്.
ഒരു നടൻ മാത്രമല്ല നല്ലൊരു കർഷകൻ കൂടിയാണ് താനെന്ന് തെളിയ്‌ക്കുന്ന തരത്തിലുള്ള വീഡിയോയാണ് അദ്ദേഹം പങ്കുവെച്ചത്. ഇൻസ്റ്റഗ്രാം വഴിയാണ് അദ്ദേഹം തന്റെ കൃഷിയിടത്തിന്റെ വീഡിയോ പങ്കുവെച്ചിരിക്കുന്നത്. തന്റെ വീട്ടുവളപ്പിലെ പച്ചക്കറി തോട്ടത്തിൽ നിന്നും വിളവെടുക്കുന്ന ജയറാമിനെ ആണ് വീഡിയോയിൽ കാണാൻ സാധിക്കുക. വെള്ളരി, മത്തൻ, കത്തിരിക്ക, തക്കാളി, വഴുതനങ്ങ തുടങ്ങി നിരവധി പച്ചക്കറികൾ അദ്ദേഹം വിളവെടുക്കുന്നുണ്ട്. മനസ്സിനക്കരെ എന്ന ചിത്രത്തിലെ ‘മറക്കുടയാൽ മുഖം മറയ്‌ക്കും’ എന്ന ഗാനവും പശ്ചാത്തലത്തിൽ ജയറാം ഉൾപ്പെടുത്തിയിട്ടുണ്ട്.
വീഡിയോയ്‌ക്ക് നിരവധി പേരാണ് കമന്റുമായെത്തിയിരിക്കുന്നത്. ‘ആക്ടർ , മിമിക്രി ആര്ടിസ്റ്റ്, ആനപ്രേമി, ചെണ്ടക്കാരൻ, കർഷകൻ, ഗായകൻ.. എന്നിങ്ങനെ തുടരുന്നു ജയരാമേട്ടന്റെ ജീവിതം, പാട്ടു കേട്ടപ്പോ തന്നെ ആ പാട്ടിലെ സീനുകളോക്കെ മനസ്സിൽ തെളിഞ്ഞു…. എവർഗ്രീൻ ഐറ്റംസ് ആണ് അതൊക്കെ’ തുടങ്ങിയ കമന്റുകളാണ് ഇൻസ്റ്റഗ്രാമിൽ നിറയുന്നത്.
